დავით აღმაშენებლის გამზირის N36-ში მდებარე ისტორიული სახლის რეაბილიტაცია პროექტ „ახალი ტფილისის“ ფარგლებში მიმდინარეობს. როგორც თბილისის მერიის მიერ გავრცელებულ ინფორმაციაშია აღნიშნული, სადარბაზოს რესტავრაციისას, შესასვლელ კარზე ძველი საფოსტო ჭრილი იქნა აღმოჩენილი, სადაც გამოიკვეთა ძველებური ორნამენტები და ისტორიული წარწერა. კარის ისტორიული დეტალები შენარჩუნდა და პირველადი სახით აღდგა.

„1903 წელს, საზოგადო მოღვაწის და მეცენატის, ერასტი ჭავჭანიძის მიერ აგებული შენობა კულტურული მემკვიდრეობის ძეგლთა ნუსხაშია შესული და განსაკუთრებულია მხატვრულ-არქიტექტურული ღირებულებით.

„სახლი ასევე ცნობილია თავისი უნიკალური მოხატული სადარბაზოთი. თბილისის განვითარების ფონდმა შენობას სრული რეაბილიტაცია-რესტავრაცია ჩაუტარა, მათ შორის:

• შენობა კონსტრუქციულად გამაგრდა

• დასუფთავდა სარდაფები

• რესტავრაცია ჩაუტარდა შენობის ფასადებს და ყველა მხატვრულ დეტალს

• პირვანდელი სახით აღდგა საფასადე ქანდაკებები

• დამზადდა ეზოში შესასვლელი ახალი ჭიშკარი

• რესტავრაცია ჩაუტარდა შენობის კარ-ფანჯრებს

•სრული რესტავრაცია ჩაუტარდა მხატვრობით გაფორმებულ ისტორიულ სადარბაზოს

• მთლიანად შეიცვალა შენობის სახურავი

• ფასადი რესტავრაციის შემდეგ ძველი პროექტის მიხედვით არსებულ ფერებში შეიღება

დავით აღმაშენებლის გამზირ N36 - ის ისტორიული სახლის სარეაბილიტაციო სამუშაოების ძირითადი ნაწილი დასრულებულია. ამჟამად შიდა ეზოს მხრიდან მდებარე ფასადების - კარ-ფანჯრების, შუშაბანდების, მოაჯირების შეცვლა და აღდგენა მიმდინარეობს.

დავით აღმაშენებლის გამზირ N36-ში მდებარე უნიკალური სახლის სრული რეაბილიტაცია, პროექტ „ახალი ტფილისის“ ფარგლებში, წლის ბოლომდე დასრულდება“,-ნათქვამია თბილისის მერიის მიერ გავრცელებულ განცხადებაში.