23 თებერვალს, შუაღამისას თურქული ჯარების კოლონამ და იარაღით სავსე სატრანსპორტო საშუალებებმა სირიის საზღვარი გადაკვეთეს და დამოუკიდებელი ქვეყნის ტერიტორიაზე, დაახლოებით 33 კილომეტრის მანძილზე შევიდნენ. კუნაპეტ ღამეში ჯარები ძველ მავზოლეუმს მიუახლოვდნენ და ისტორიული არტეფაქტები და რელიგიური სიწმინდეები გაანადგურეს. შემდეგ იქვე თურქული დროშა ააფრიალეს და კომპლექსი მთლიანად მიწასთან გაასწორეს.

აღნიშნულის შესახებ ამერიკული გამოცემა The Washington Post - ი წერს.

სირიის სამოქალაქო ომის ფონზე, სულეიმან შაჰის საფლავის ისტორია, შაჰისა, რომელიც მე-12 საუკუნის გამოჩენილი მხედართმთავარი და ოტომანთა იმპერიის პირველი იმპერატორის ბაბუა იყო, შესაძლოა უცნაურ და უმნიშვნელო რამედ მოგვეჩვენოს. სირიის მთავრობამ თურქული მხარის ამგვარი ქმედება „საზარელ აგრესიად“ შეაფასა, მაგრამ მას არ ძალუძს პასუხის გაცემა თურქეთისთვის, რადგან დაკარგული აქვს კონტროლი ქვეყნის ჩრდილოეთის მნიშვნელოვან ნაწილზე, რომელსაც ქურთული მილიცია და მეამბოხეები აკონტროლებენ.

თურქეთისთვის კი, რომელიც ათწლეულები ახორციელებდა სულეიმან შაჰის სამარის ადმინისტრირებას, ეს ნაბიჯი დიდი ხნის დაგვიანებულიც კი იყო. ანკარას ეს ქმედება კი გვაფიქრებინებს, რომ თურქეთი სირიის ჩრდილო-აღმოსავლეთის დე ფაქტო სტატუს ქვოს - სადაც ძალაუფლება სირიელ ქურთებს უპყრიათ - შესაძლოა ცოტა უფრო პრაგმატულად უდგება.