„მე დიდი იმედი მაქვს, რომ ახალ სასწავლო წელს ვხვდებით უფრო მოტივირებული, დამშვიდებული, დაწყნარებული მასწავლებლებით, რომლებსაც არც გამოცდას, არც ჩაჭრას, არც გაყრას არავინ უპირებს. მე დარწმუნებული ვარ ისინი ახალი ენერგიით შეუდგებიან მუშაობას თავანთ მოსწავლეებთან”, - განაცხადა განათლებისა და მეცნიერების მინისტრმა, ალექსანდრე ჯეჯელავამ.

მისი თქმითვე, ბევრ სკოლაში მნიშვნელოვნად გაუმჯობესებული ინფრასტრუქტურაა.

„პირველ რიგში გვიხარია, რომ სკოლაში მეტი პირველკლასელი მიდის. ძალიან ბევრ ადგილას ახალ სასწავლო წელს ვხვდებით მნიშვნელოვნად გაუმჯობესებული ინფრასტრუქტურით, ზოგან გადასარევი ინფრასტრუქტურით, მათ შორის ჩვენი ამერიკელი მეგობრების დახმარებით რეაბილიტირებული სკოლები აბსოლუტურად ფანტასტიკურია, დაუჯერებელია და მოგინდებათ სკოლაში დაბრუნება. ასევე, ახალ სასწავლო წელს ვხვდებით ძალიან დროულად და ოპერატიულად დარიგებული სახელმძღვანელოებით, მოსწავლეების კომპიუტერებით“,-აღნიშნა მან და დასძნია, რომ მოსწავლეები უფასო სახელმძღვანელოების შერეულ კომპლექტს მიიღებენ, რომელთა დაახლოებით 30% ახალი, ხოლო დაახლოებით 70% მეორადი, 2-3 წლის წიგნები იქნება.

მინისტრის განცხადებით, ძალიან დაზიანებული წიგნები მოხმარებიდან ამოღებულია.

„წესით ძალიან დაზიანებული წიგნები არც ერთ მოსწავლეს არ უნდა შეხვდეს, თუმცა მინისტრმა არ გამორიცხა, რომ შესაძლოა ასეთი მაგალითები იყოს“,-აღნიშნა ჯეჯელავამ.

საჯარო სკოლებში ახალი სასწავლო წელი ხვალ იწყება.