პრეზიდენტმა დონალდ ტრამპმა განაცხადა, რომ მას „არ აქვს ეჭვი“, რომ მისი ადმინისტრაცია კანონიერად გაიმარჯვებს მოგზაურობის აკრძალვის გამოწვევებზე.

იაპონიის პრემიერ მინისტრ შინძო აბესთან ერთობლივ პრესკონფერენციაზე ტრამპმა ასევე პირობა დადო, რომ „სწრაფად“ წარმოადგენს მომავალ კვირას შეერთებული შტატებისთვის „დამატებითი უსაფრთხოების“ ზომებს.

„ჩვენ შევინარჩუნებთ უსაფრთხოებას ჩვენ ქვეყანაში, ჩვენ ყველაფერს გავაკეთებთ რაც კი საჭიროა ჩვენი ქვეყნის უსაფრთხოების შესანარჩუნებლად“, განაცხადა ტრამპმა თეთრ სახლში პარასკევს.

„ჩვენ რაღაცას ძალიან სწრაფად გავაკეთებთ იმისათვის, რომ ჩვენი ქვეყნის დამატებითი უსაფრთხოება უზრუნველვყოთ, თქვენ ამას მომავალ კვირას ნახავთ“, დაამატა მან.

„დამატებით, ჩვენ განვაგრძობთ სასამართლოში პროცესის წარმართვას და საბოლოოდ, ეჭვი არ მეპარება, რომ ჩვენ გავიმარჯვებთ ამ საქმეში“.

შეერთებული შტატების სააპელაციო სასამართლომ ხუთშაბათს უარი განაცხადა პრეზიდენტ დონალდ ტრამპის მცდელობაზე წინანდელ მდგომარეობაში აღედგინა მისი 7 მუსულმანური ქვეყნიდან ვიზიტორების აკრძალვა.

მე-9 ფედერალურმა საოლქო სააპელაციო სასამართლომ განაცხადა, რომ იგი არ დაბლოკავს უფრო დაბალი ინსტანციის სასამართლოს გადაწყვეტილებას, რომელმაც შეაჩერა ტრამპის ბრძანება.

ტრამპმა სააპელაციო სასამართლოს აღნიშნულ გადაწყვეტილებას „თვითერზე“ გაბრაზებით უპასუხა, განაცხადა რა, რომ ეროვნული უსაფრთხოება რისკის ქვეშაა.

სასამართლოს ერთსულოვანი გადაწყვეტილება 3-0 ამბობს, რომ მთავრობამ ვერ დაამტკიცა, რომ ტერორიზმის საფრთხე ამართლებდა აკრძალვის აღდგენას.

სასამართლოს გადაწყვეტილება კი ნიშნავს იმას, რომ ტრამპის დირექტივა შეჩერებული რჩება და ვიზების და მწვანე ბარათების მფლობელებს ერაყიდან, სირიიდან, ირანიდან, ლიბიიდან, სომალიდან, სუდანიდან და იემენიდან შეერთებულ შტატებში შესვლა შეეძლებათ. ამერიკაში შესვლის აკრძალვის შეჩერება ასევე გავრცელდება ლტოლვილებზეც.

საქმე ახლა მოსალოდნელია, რომ საბოლოოდ შეერთებული შტატების უზენაეს სასამართლოში დასრულდეს.

რამდენიმე დღის წინათ აშშ-ის პრეზიდენტმა დონალდ ტრამპმა განაცხადა, რომ მან უთხრა შეერთებული შტატების სასაზღვრო უწყების ოფიციალურ პირებს, „ძალიან დიდი სიფრთხილით“ შეამოწმონ ამერიკაში შემსვლელი ადამიანები.

ტრამპმა აღნიშნული განცხადება მას შემდეგ გააკეთა, რაც შეერთებული შტატების სააპელაციო სასამართლომ შაბათს, უარი განუცხადა ტრამპის ადმინისტრაციას დაუყოვნებლივ აღადგინოს მოგზაურობის აკრძალვა უწინდელ მდგომარეობაში.

ტრამპმა აღნიშნა, რომ სასამართლოები „საქმეს ძალიან ართულებენ“ და თუ რამე მოხდება, მათი ბრალი იქნება.

სიეტლში, შეერთებული შტატების მოსამართლემ გასული კვირის პარასკევს პრეზიდენტ დონალდ ტრამპის 7 მუსულმანური ქვეყნიდან მოქალაქეების ამერიკაში შეშვების აკრძალვაზე დროებითი დაბლოკვის გადაწყვეტილება გამოსცა, რაც მთელი ქვეყნის მასშტაბით ვრცელდება.

ფედერალური მოსამართლის, ჯეიმს რობარტის განაჩენით, მთავრობის ადვოკატების მტკიცებები, რომ ამერიკის შტატებს არ ჰქონდათ უფლებამოსილება გამოწვევის წინაშე დაეყენებინათ ტრამპის საპრეზიდენტო ბრძანება, არ იქნა გათვალისწინებული.

სახელმწიფო დეპარტამენტის განცხადებით, ტრამპის ბრძანების გამოცემის შემდეგ 60 000 ვიზა გაუქმდა.

შეერთებული შტატების იუსტიციის დეპარტამენტმა სასამართლოს პრეზიდენტ დონალდ ტრამპის 7 მუსულმანური ქვეყნიდან მოქალაქეების ამერიკაში შეშვების აკრძალვის შეჩერების წინააღმდეგ შუამდგომლობით გასული კვირის შაბათს მიმართა.

მოპასუხე მხარე, რომელთა შორის იყო შეერთებული შტატების პრეზიდენტი დონალდ ტრამპი, ცდილობდა ვაშინგტონის შტატში ფედერალური მოსამართლის მიერ პარასკევს მიღებული სასამართლო გადაწყვეტილება გაეუქმებინა.

კვირას პრეზიდენტმა ტრამპმა კიდევ უფრო მეტი კრიტიკული დამოკიდებულება გამოხატა სიეტლის მოსამართლის, ჯეიმს რობარტის, რომელმაც დაბლოკა აკრძალვა, და ასევე მთლიანად ქვეყნის სასამართლო სისტემის მიმართ.

„თვითერზე“ სერიულად გაკეთებულ განცხადებებში ტრამპმა თქვა: „მე უსაფრთხოების სამსახურებზე ინსტრუქცია გავეცი, ძალიან დიდი სიფრთხილით შეამოწმონ ჩვენ ქვეყანაში შემომსვლელი ადამიანები“.

„უბრალოდ არ შემიძლია დავიჯერო რომ მოსამართლეს შეუძლია ჩააყენოს ქვეყანა ამგვარ საფრთხეში. თუ რამე მოხდება, ბრალი დაედება მას და სასამართლო სისტემას. ხალხი მოაწყდება. ცუდია!“

უფრო ადრე ტრამპმა ფედერალურ მოსამართლეს „ეგრეთ წოდებული“ მოსამართლე უწოდა, რომლის „სასაცილო“ სასამართლო გადაწყვეტილება „კანონის ცხოვრებაში გატარებას არსებითად აკნინებს“ შეერთებულ შტატებში.

„ამ ეგრეთ წოდებული მოსამართლის სასამართლო გადაწყვეტილება, რომელიც კანონის ცხოვრებაში გატარებას არსებითად აკნინებს ჩვენ ქვეყანაში, სასაცილოა და გაუქმდება“, - დაწერა ტრამპმა „თვითერზე“.

„როდესაც ქვეყანა უკვე აღარ არის იმის შემძლე თქვას, ვის შეუძლია და ვის არ შეუძლია შემოსვლა და გასვლა, განსაკუთრებით უსაფრთხოების მიზეზებით - დიდი უბედურებაა“, - განაცხადა ტრამპმა „თვითერზე“ განცალკევებით.

ტრამპის საპრეზიდენტო ბრძანებაში დასახელებული 7 სახელმწიფოს იმ მოქალაქეებს, რომელთაც აშშ-ის მოქმედი ვიზები გააჩნიათ, ბრძოლა უწევდათ შეერთებული შტატების მიმართულებით მიმავალ თვითმფრინავებზე ასასვლელად.

გასულ შაბათს დემონსტრაციები ისევ გაიმართა ვაშინგტონში, მაიამიში და ამერიკის სხვა ქალაქებში, ისევე როგორც ევროპის რამდენიმე ქვეყნის დედაქალაქებში.

ათასობით ადამიანი გამოვიდა ლონდონში, შედარებით ნაკლები პარიზში, ბერლინში, სტოკჰოლმსა და ბარსელონაში.

ტრამპის მხარდამჭერებმა კონტრ-პროტესტი გამოხატეს შეერთებულ შტატებში.

ამერიკის შეერთებული შტატების პრეზიდენტი დონალდ ტრამპი აღთქმას დებდა, რომ გააუქმებდა სასამართლოს გადაწყვეტილებას, რომელმაც შეაჩერა მისი ბრძანება, რაც 7 მუსულმანური ქვეყნიდან ამერიკაში მოქალაქეების შეშვების აკრძალვას ითვალისწინებდა.

ტრამპის ადმინისტრაცია ამტკიცებს, რომ პრეზიდენტის ბრძანება, რომელმაც დაბნეულობა და სიბრაზე გამოიწვია, შეერთებული შტატების დაცვაზეა ორიენტირებული.

ტრამპის ბრძანებამ შეერთებული შტატების ლტოლვილთა მიღების პროგრამა 120 დღით შეაჩერა, სირიელ ლტოლვილებს კი სამუდამოდ აუკრძალა ამერიკაში შესვლის უფლება, ხოლო ერაყის, სირიის, ირანის, ლიბიის, სომალის, სუდანის და იემენის ვიზის მფლობელ ნებისმიერ მოქალაქეს 90 დღის განმავლობაში შეუჩერა ამერიკის შეერთებულ შტატებში შესვლის უფლება.

ახლა კი აშშ-ის სააპელაციო სასამართლომ გადაწყვიტა, რომ მათ ამერიკაში შესვლის უფლება აქვთ.

ტრამპის ბრძანების წინააღმდეგ სარჩელი თავდაპირველად ვაშინგტონის შტატის სასამართლოში იქნა შეტანილი, მოგვიანებით კი მინესოტაში.

ვაშინგტონის შტატის გენერალურმა პროკურორმა ბობ ფერგიუსონმა აკრძალვას არაკანონიერი და არაკონსტიტუციური უწოდა, რადგან ის ადამიანების რელიგიური საფუძვლების წინააღმდეგ დისკრიმანაციას წარმოადგენს.