სენატორმა ჯონ მაკკეინმა, დაიცვა რა მედია პრეზიდენტ დონალდ ტრამპის მიერ ბოლოდროინდელი თავდასხმებისაგან, გამაფრთხილებელი განცხადება გააკეთა, რომ თავისუფალი პრესის ჩახშობა იმის მანიშნებელია, „თუ როგორ იწყებენ დიქტატორები“.

არიზონას „რესპუბლიკელმა“ სენატორმა, რომელიც ხშირად აკრიტიკებს ტრამპს, აშშ-ის პრეზიდენტის „თვითერზე“ გამოქვეყნებულ იმ განცხადებას უპასუხა, სადაც ტრამპი წამყვან ამერიკულ ტელევიზიებს, მათ შორის CNN-ს და NBC-ს, ასევე The New York Times-ს „ამერიკელი ხალხის მტრებს“ უწოდებს.

„მე მძულს პრესა. განსაკუთრებით მძულხართ თქვენ“, უთხრა NBC-ისთან ინტერვიუში მაკკეინმა ჩაკ თოდს მიუნხენის უსაფრთხოების საერთაშორისო კონფერენციიდან. „მაგრამ ფაქტი ისაა, რომ ჩვენ გვჭირდებით თქვენ. ჩვენ გვჭირდება თავისუფალი პრესა. ჩვენ უნდა გვქონდეს ის. ეს მნიშვნელოვანია“.

„თუ თქვენ გინდათ დაიცვათ - ახლა მე ამას მთელი სერიოზულობით ვამბობ - თუ თქვენ გინდათ დაიცვათ დემოკრატია, უნდა არსებობდეს თავისუფალი და მტრული პრესა და ამის გარეშე, ვშიშობ, რომ ჩვენ, დროთა განმავლობაში ჩვენ პიროვნულ თავისუფლებებს დავკარგავდით. ეს არის ის, თუ როგორ იწყებდნენ დიქტატორები“, განაცხადა მაკკეინმა და განაგრძო:

„ისინი იწყებდნენ თავისუფალი პრესის ჩახშობით... როცა გადახედავთ ისტორიას, პირველი რამ რასაც დიქტატორები აკეთებდნენ, პრესის დახურვა იყო. და მე არ ვამბობ, რომ პრეზიდენტი ტრამპი ცდილობს იყოს დიქტატორი. მე უბრალოდ ვამბობ, რომ ჩვენ უნდა ვისწავლოთ გაკვეთილები ისტორიიდან“.