ცნობილი გახდა „ეარბას А-320“-ის მეორე პილოტის ვინაობა, რომელსაც, მარსელის პროკურატურის აზრით, შეიძლება ავიაკატასტროფა გამოეწვია. ის გერმანიის მოქალაქე, 28 წლის ანდრეას ლუბიცია.


გამოძიების ინფორმაციით, რომელიც „შავი ყუთის“ შესწავლის შემდეგ გავრცელდა, ლუბიცი კატასტროფის დროს პილოტის კაბინაში მარტო იმყოფებოდა და მან თვითმფრინავის დაშვება შეგნებულად განახორციელა. გამოძიების მასალების მიხედვით, დაშვების დაწყებამდე ცოტა ხნით ადრე ხომალდის კაპიტანმა ლუბიცს ავიალაინერის მართვა გადასცა და თვითონ კაბინიდან გავიდა.



„ამის შემდეგ ისმის, რომ პილოტის სავარძელი უკან იწევა – ეს ნიშნავს, რომ კაპიტანმა კაბინა დატოვა. კაბინაში დაბრუნება პირველმა პილოტმა ვეღარ შეძლო. კარის გახსნის თხოვნას მეორე პილოტი არ პასუხობდა. 2001 წლის 11 სექტემბერს ნიუ -იორკში მომხდარი ტერაქტების შემდეგ თვითმფრინავის კაბინის კარი გარედან არ იხსნება. ამის შემდეგ ხომალდის მეთურმა კარის შენგრევა სცადა, მაგრამ ეს არ გამოუვიდა“, – განაცხადა მარსელის პროკურორმა.


პროკურორის ინფორმაციით, აუდიოჩანაწერის ბოლომდე პილოტების სუნთქვის ხმები ისმის. ასე, რომ გამომძიებელთა აზრით, ანდრეას ლუბიცმა ლაინერის დაშვება შეგნებულად დაიწყო. ბრიუს რობინის თქმით, ტერმინი „თვითმკვლელობა“ მხოლოდ ერთი ადამიანის გარდაცვალების შემთხვევაში გამოიყენება. „ამ ტერმინს მოცემულ შემთხვევაში მე არ ვიხმარდი“, – ამბობს რობინი. გამოძიების ინფორმაციით, ანდრეას ლუბიცმა A320-ზე რამდენიმე თვე იმუშავა.