თურქეთის პრეზიდენტმა რეჯეფ თაიფ ერდოღანმა ჰოლანდიელები აღწერა, როგორც „ნაცისტური გადმონაშთები და ფაშისტები“ იმ ფონზე, როცა ევროპაში - გერმანიასა და ჰოლანდიაში - თურქეთის მთავრობის მინისტრების მონაწილეობით დაგეგმილი მიტინგების გაუქმების გამო დიპლომატიური სკანდალი იზრდება.

როგორც BBC იუწყება, თურქეთის საგარეო საქმეთა მინისტრს, მევლუთ ჩავუშოღლუს შაბათს ნიდერლანდების ქალაქ როტერდამში თურქული დიასპორის წარმომადგენლებისთვის სიტყვით უნდა მიემართა, სადაც მას მათთვის უნდა მოეწოდებინა აპრილში დაგეგმილ საკონსტიტუციო რეფერენდუმზე ერდოღანისთვის უფრო დიდი ძალაუფლების მინიჭების მხარდაჭერისაკენ. მაგრამ მიტინგის გამართვა უსაფრთხოების მიზეზებით აიკრძალა და ამის შემდეგ მინისტრის თვითმფრინავს დაშვებაზე უარი განუცხადეს.

ნიდერლანდების პრემიერ მინისტრმა მარკ რუტემ განაცხადა, რომ ერდოღანის კომენტარი „რა თქმა უნდა, გადარეული შენიშვნა“ იყო.

თურქეთმა ნიდერლანდების დიპლომატიური მისიის ხელმძღვანელი ანკარაში, საგარეო საქმეთა სამინისტროში გამოიძახა, რათა მისგან ახსნა-განმარტება მოისმინოს.

ერდოღანი მისი საგარეო საქმეთა მინისტრის ნიდერლანდებში შეშვების აკრძალვის გამო ჰოლანდიური ფრენების დაბლოკვით დაიმუქრა.

მან თქვა: „... ამიერიდან, მოდი ვნახოთ, როგორ დაეშვებიან თქვენი თვითმფრინავები თურქეთში“.

საგარეო საქმეთა მინისტრმა მევლუთ ჩავუშოღლუმ ასევე გააფრთხილა ნიდერლანდები, რომ თურქეთი დააწესებდა მკაცრ სანქციებს, თუკი მისი ვიზიტი დაიბლოკებოდა.

რუტემ გამაფრთხილებელი განცხადება გააკეთა (ჰოლანდიურ ენაზე), რომ თურქეთის მუქარამ სანქციების შესახებ „გონივრული გადაწყვეტილების ძიება შეუძლებელი“ გახადა.

რუტემ ასევე ხაზი გაუსვა, რომ ჰოლანდიის ოფიციოზმა უფრო ადრე განიხილა საკითხი, ჩავუშოღლუს მონაწილეობით დაგეგმილი მიტინგი შეიძლებოდა თუ არა კერძო და „უფრო მცირე“ მასშტაბის ყოფილიყო და ის თურქეთის საკონსულოსა ან საელჩოში ჩატარებულიყო.

ნიდერლანდები „წუხს მოვლენების ამგვარად განვითარების გამო და რჩება თავდადებული თურქეთთან დიალოგისათვის“, ნათქვამია განცხადებაში, რომლის მოკლე თარგმანსაც BBC ავრცელებს.