ქვემო და ზემო სვანეთის ერთმანეთთან დამაკავშირებელი საავტომობილო გზის მშენებლობა იწყება - ლენტეხი და მესტია ერთმანეთს შესაძლოა, 6-კმ-იანი გვირაბითაც დაუკავშირდნენ
17-03-2017, 00:27

შრიფტის ზომა: [ A+ ] / [ A- ]

 

ქუთაისი–ლენტეხი–უშგული–მესტიის დამაკავშირებელი საავტომობილო გზის ლენტეხი-ლასდილის 12-კილომეტრიანი მონაკვეთის და მესტიის მუნიციპალიტეტში, უღვირიდან უშგულის მიმართულებით 10-კილომეტრიანი საგზაო მონაკვეთის მშენებლობა იწყება. აღნიშნულ ინფორმაციას Guardian.ge-ს ლენტეხისა და მესტიის მუნიციპალიტეტების გამგებლები - ამირან ჯამბურიძე და კაპიტონ ჟორჟოლიანი უდასტურებენ.

 

 

 

(კაპიტონ ჟორჟოლიანი, მესტიის მუნიციპალიტეტის გამგებელი, Guardian.ge-ს ფოტო)

 

 

„უღვირიდან უშგულის მიმართულებით 10-კილომეტრიანი საგზაო მონაკვეთის მშენებლობა იწყება. გვყავს უკვე ტენდერში გამარჯვებული კომპანია „მამისონი“, რომელიც დაიწყებს სამუშაოებს აღნიშნულ მონაკვეთზე. მინდა გითხრათ, რომ ტექნიკა უკვე შემოჰყავთ და უახლოეს დღეებში დაიწყება სამუშაოები.

 


აღნიშნული პროექტი ორწლიანია და 2018 წელს დასრულდება. მოგეხსენებათ, აქ ისეთი ადგილებია, არ არის მარტივი მუშაობა და კლიმატური პირობებიდან გამომდინარე, სამუშაო პერიოდიც მხოლოდ ექვსი თვეა, ამიტომ, ამ პროექტის განხორციელება ბუნებრივია, წელს სრულად ვერ მოესწრება, სამუშაოების მე-2 ეტაპი 2018 წელს გაგრძელდება და დასრულდება კიდეც“, განუცხადა Guardian.ge-ს მესტიის მუნიციპალიტეტის გამგებელმა, კაპიტონ ჟორჟოლიანმა.

 

 

 

 

(მესტიის მუნიციპალიტეტი, 2016 წლის მარტი, Guardian.ge-ს ფოტო)

 

 


მესტიის მუნციპალიტეტის ტერიტორიაზე სამუშაოების პარალელურად საავტომობილო გზის აღდგენა იწყება ლენტეხის მუნიციპალიტეტშიც, რომლის გამგებლის, ამირან ჯამბურიძის თქმითაც, თავიანთ ტერიტორიაზე გამავალი გზის 12 კმ-იანი მონაკვეთის აღსადგენად 9 მილიონი ლარი დაიხარჯება, სამუშაოები აპრილში დაიწყება და მიმდინარე წელსვე დასრულდება. წელსვე, სავარაუდოდ, აღნიშნული ინფრასტრუქტურული პროექტის ფარგლებში, ამავე გზის გაგრძელებაზე, უშგულის მიმართულებით, კიდევ „12 კმ სიგრძის საგზაო მონაკვეთის აღდგენაც დაიწყება“ და ჯამში, ლენტეხი-ლასდილი-უშგულის საავტომობილო გზაზე ასფალტის საფარი 24 კილომეტრზე დაიგება.

 


საერთო ჯამში კი, ქუთაისი–ლენტეხი–უშგული–მესტიის დამაკავშირებელი საავტომობილო გზის, დაახლოებით, 100-კილომეტრიანი მონაკვეთის აღდგენა 2018 წელს უნდა დასრულდეს, რა დროისთვისაც მესტიის მხრიდანაც უშგულამდე ასფალტის დაგების პროცესიც დასრულებული უნდა იყოს, ეს კი, როგორც ჯამბურიძე აცხადებს, ადგილობრივ მცხოვრებლებს და რეგიონში მომრავლებულ ტურისტებს კომფორტული გადაადგილების საშუალებას მისცემს და ქვემო და ზემო სვანეთში კიდევ უფრო მეტი ტურისტის მოზიდვის წინაპირობას შექმნის.

 


ლენტეხის მუნიციპალიტეტის გამგებელი ამირან ჯამბურიძე ინფრასტრუქტურულ ღონისძიებებს ლენტეხისა და მესტიის მუნიციპალიტეტებისთვის „სასიცოცხლოდ აუცილებელს“ უწოდებს.

 

 

 

(ამირან ჯამბურიძე, ლენტეხის მუნიციპალიტეტის გამგებელი, Guardian.ge-ს ფოტო)

 


„ლენტეხი-ლასდილის დამაკავშირებელი 12-კილომეტრიანი ცენტრალური გზის აღდგენას ვიწყებთ, სავარაუდოდ, აპრილში - ეს გზა უნდა გაკეთდეს წელს. აპრილის თვეში ტენდერზე დაიდება ასევე ამ გზის გაგრძელებაზე კიდევ 12 კმ-ის აღსადგენად პროექტი. სავარაუდოა, რომ ამ 12 კმ-ის გაკეთებაც მოესწროს წელს, დაწყებით კი, დაიწყება.

 


მესტიის მხრიდანაც ორი ტენდერია - ერთი თუ არ ვცდები 10-კმ-იანი, მეორე 19-კმ-იანი საგზაო მონაკვეთის ასფალტირებას ითვალისწინებს. გზა მიდის უშგულამდე. ამ მონაკვეთების ასფალტირების გარდა, მთიან ზოლშიც, სადაც არსებობს ისედაც საავტომობილო გზა, თუმცა, არ არის მოწესრიგებული, უნდა დაიწყოს მშენებლობები. საერთო ჯამში ლენტეხი-მესტიის საავტომობილო გზის მშენებლობა, რომელიც დაახლოებით 100 კმ-ია, 2018 წელს დასრულებული იქნება.

 


ეს გზა ლენტეხის მუნიციპალიტეტში გააცოცხლებს სოფლებს; მოსახლეობას ექნება თავისუფლად გადაადგილების საშუალება. სივრცით მოწყობაში გათვალისწინებულია ისიც, რომ ტურისტს გადაადგილების ნორმალური საშუალება ჰქონდეს, ტურისტთა რაოდენობა კი, მოგეხსენებათ, აისახება ადგილობრივ ბიუჯეტზე. საოჯახო სასტუმროებზე სერიოზული მოთხოვნები არის უკვე, უამრავი სიკეთე მოაქვს ამ გზას“, განუცხადა ლენტეხის გამგებებლმა Guardian.ge-ს.

 


ქუთაისი–ლენტეხი–უშგული–მესტიის დამაკავშირებელი საავტომობილო გზის მშენებლობა 2016 წელს უნდა დაწყებულიყო, რაც არაერთხელ დააანონსეს მთავრობის წარმომადგენლებმა, თუმცა, ინფრასტრუქტურული ღონისძიებები არ განხორიცელებულა.

 


ამირან ჯამბურიძე 2016 წლისთვის დაგეგმილ, თუმცა, შეუსრულებელ პროექტზე საუბრისას აცხადებს, რომ გეგმის განუხორციელებლობა სახელმწიფო ტენედერის შედეგად გამარჯვებული კომპანიის მიზეზით მოხდა.

 


„გასულ წელს გვყავდა გამარჯვებული კომპანია, რომელმაც შემოდგომაზე გვიან დაიწყო მოსამზადებელი სამუშაოები, კონკრეტულად კი, გზის გაფართოება, არსებული გზის ზედა ფენის მოხსნა, თუმცა, ამ კომპანიამ ვერ გაართვა სამუშაოებს თავი. არ გამოდგა ეს კომპანია, შემდეგ სახელმწიფომ მისი დისკვალიფიცირება მოახდინა. პროექტი კი სახელმწიფო ტენდერზე თავიდან დაიდო. ახლა ახალი გუნდი და ახალი კომპანიაა შემოსული“, - განმარტავს ამირან ჯამბურიძე.

 


ლენტეხი-უშგულის მონაკვეთის სარეაბილიტაციო პროექტის მიხედვით, გზა აღმოსავლეთიდან უვლის დასახლებულ პუნქტებს და გადის უშგულში, უშგულიდან კი მესტიაში.

 


გზა გაივლის 36 სოფელს, მათ შორის, საყდარს, მარგვიშს, ლაშხეთის სოფლებს. ამ მონაკვეთის მშენებლობა იძლევა საშუალებას ცაგერი-ლენტეხის გავლით, უმოკლესი გზით მოხვდეს ადამიანი მესტიაში.

 

 

 

(დაბა ლენტეხი, 2017 წელი, 31 იანვარი, Guardian.ge-ს ფოტო)

 


აღნიშნული პროექტის გარდა, ალტერნატიული გზის პროექტიც არსებობს, რაც ლენტეხი-მესტიის დამაკავშირებელ გვირაბს გულისხმობს. ლენტეხის გამგებლის თქმით, გვირაბის პროექტი ძალაშია და ძირითადად, ოთხ სავარაუდო მიმართულებაზე საუბრობენ, სადაც გვირაბი უნდა გაკეთდეს, თუმცა, მისივე განცხადებით, აქცენტი ლენტეხი-ლატალის მიმართულებაზე კეთდება. გვირაბი 6-კილომეტრიანი იქნება.

 

 

 

(მესტიის მუნიციპალიტეტი, 2017 წლის იანვარი, Guardian.ge-ს ფოტო).  

 


ამირან ჯამბურიძე მიიჩნევს, რომ გვირაბის პროექტის განხორციელება რეგიონისთვის აუცილებლობას წარმოადგენს. მისი თქმით, გარდა იმისა, რომ გვირაბით ლენტეხიდან მესტიამდე ჩასვლა 10 წუთში იქნება შესაძლებელი და ქვემო და ზემო სვანეთის მცხოვრებლები, რომელთაც მჭიდრო კავშირები აქვთ ერთმანეთთან, უმოკლეს პერიოდში შეძლებენ დაკავშირებას, აღნიშნული პროექტის განხორციელებით ქუთაისიდან მესტიის მიმართულებით, ზუგდიდის გავლით არსებული ისტორიული საგზაო მარშრუტის ალტერნატივა ჩნდება (ქუთაისი-წყალტუბო-ცაგერი-ლენტეხი-მესტია), რაც გვირაბის შემთხვევაში ქუთაისიდან მესტიამდე გზას დაახლოებით 150 კილომეტრით ამცირებს, ეს კი ამირან ჯამბურიძის თქმით, არამარტო მესტიისთვის ნიშნავს მეტ ქართველ და უცხოელ ტურისტს, არამედ ქვემო სვანეთის და ლეჩხუმისთვისაც.

 

 

(დაბა მესტია, 2016 წლის მარტი, Guardian.ge-ს ფოტო). 

კომენტარები: 0
კომენტარის დატოვება

თქვენი სახელი:*
თქვენი E-Mail:
  ქართულად წერა  
 

ძვირფასო მკითხველო! გამოხატეთ თქვენი აზრი აღნიშნული თემის გარშემო. გთხოვთ დაიცვათ კორექტულობა და პატივი სცეთ სხვების მოსაზრებებს.

მუქი დახრილი ხაზგასმული აღნიშნული | მარცხნივ განთავსება ცენტრში განთავსება მარჯვნივ განთავსება | სმაილების ჩასმა ლინკის ჩასმაფარული ლინკის ჩასმა Choice the color | ფარული ტექსტი ციტირების ჩასმა მონიშნული ტექტსი კირილიკურზე გადაყვანა. Insert spoiler

შეიყვანე კოდი: *

ამერიკის შეერთებული შტატების მიერ 2017 წლის 23 აგვისტოდან არასაემიგრაციო ვიზების გაცემის მთელი რუსეთის მასშტაბით შეჩერებასთან დაკვშირებით რუსეთის საგარეო საქმეთა მინისტრმა უპასუხა. სერგეი ლავროვმა განაცხადა, რომ მოსკოვი ამერიკელ მოქალაქეებს რუსული ვიზების მიღების პროცედურას არ გაურთულებს.

თვითმკვლელი ქამრის მატარებელი მამაკაცი, რომლის ლიკვიდაციაც ესპანეთის პოლიციამ სულ ახლახან მოახდინა, ბარსელონას ტერაქტში ეჭვმიტანილი, 22 წლის იოუნს აბოუიაყუბია. ინფორმაციას ესპანური მედია ხელისუფლებაზე დაყრდნობით ავრცელებს.

ყველაზე კითხვადი
  1. პრეზიდენტმა ტრამპმა განაცხადა, რომ ტრანსგენდერი ადამიანები ვერ იმსახურებენ „ვერც ერთ თანამდებობაზე“ აშშ-ის არმიაში
  2. მიხეილ სააკაშვილი: ქართველი ხალხი გამოვა ქუჩებში და გააძევებს ივანიშვილს, როგორც კი მე გამოვჩნდები თბილისში
  3. ნიკა მელიამ მაიკ პენსს უთხრა: „ბატონო ვიცე-პრეზიდენტო, ხელისუფლება იმართება ‘გაზპრომის’ აქციონერის, ბიძინა ივანიშვილის მიერ, რომელსაც არ უკავია არავითარი ოფიციალური თანამდებობა“
  4. ალექსეი სტოლიაროვმა განაცხადა, რომ მინისტრ მღებრიშვილთან სააკაშვილზე ჩაწერილი სატელეფონო საუბარი ნამდვილია და ის „შეუძლია გადასცეს ნებისმიერ ექსპერტიზას“
  5. ოფიციალურმა ფხენიანმა განაცხადა, რომ აშშ-ის ტერიტორიაზე რაკეტების დარტყმის გეგმა „აგვისტოს შუა პერიოდისთვის“ იქნება მზად
  6. პრეზიდენტმა ტრამპმა განაცხადა, რომ ნებისმიერ ფასად უნდა შეჩერდეს რადიკალური ისლამისტური ტერორიზმი
  7. ლადო პაპავა ჯეჯელავას წინააღმდეგ: „გასაგებია, რომ პრემიერ მინისტრი კრონიზმის სენითაა დაავადებული, მაგრამ „ქართულ ოცნებას“ ხომ ჰყავს სხვა ლიდერებიც, მათ რაღა დაემართათ?“
  8. სერგეი ლავროვმა განაცხადა, რომ ჩრდილოეთ კორეის სამხედრო კონფლიქტის ალბათობა ძალიან მაღალია
  9. ამერიკის შეერთებული შტატები მთელი რუსეთის მასშტაბით აჩერებს არასაემიგრაციო ვიზების გაცემას
  10. კიმ ჩენ ინმა აშშ-ის ტერიტორიის, გუამის მიმართულებით რაკეტების გაშვების გადაწყვეტილება გადადო
ბოლო სიახლეები
ამინდის პროგნოზი
ვალუტის კურსი