სულ მცირე ექვსი ადამიანი, მათ შორის ორი პოლიციელი იქნა მოკლული და ათეულობით დაიჭრა ბანგლადეშში შაბათს, ორი ბომბის აფეთქების შედეგად, შეურიგებელ მებრძოლთა თავშესაფრის სიახლოვეს, სადაც სადესანტო-დივერსიული რაზმები რეიდს ატარებდნენ. ინფორმაციას სააგენტო „როიტერსი“ პოლიციაზე დაყრდნობით ავრცელებს.

სილჰეტის ჩრდილო-აღმოსავლეთ რაიონში აფეთქებებს წინ უძღოდა თვითმკვლელის მიერ საკუთარი თავის აფეთქება ქვეყნის მთავარი აეროპორტის შესასვლელთან, უსაფრთხოების ბარიერთან, რაზეც პასუხისმგებლობა „ისლამურმა სახელმწიფომ“ აიღო.

„სულ მცირე ექვსი ადამიანი, მათ შორის პოლიციის ორი ოფიციალური პირი იქნა მოკლული ორი აფეთქებისას - ერთ-ერთი მათგანი თავშესაფრის სიახლოვეს, მეორე კი შენობის წინ“, განაცხადა სილჰეტის პოლიციის წარმომადგენელმა ზედან ალ მუსამ და დაამატა, რომ დაჭრილია 40-ზე მეტი ადამიანი, რომელთაგან რამდენიმეს მდგომარეობა კრიტიკულია. დაჭრილთა შორის არმიის და პოლიციის ათეულობით თანამშრომელია.

მეთვალყურეობის სამსახურის ცნობით, რომელიც მებრძოლთა დაჯგუფების ახალი ამბების სააგენტო „ამაყს“ იმოწმებს, „სილჰეტში ბანგლადეშის ძალებზე დაბომბვის“ პასუხისმგებლობა „ისლამურმა სახელმწიფომ“ აიღო.

არმიის სადესანტო-დივერსიულმა რაზმებმა გასულ წელს კაფეზე მომხდარი თავდასხმის ბრალდებით, რასაც 22 ადამიანის, უმეტესწილად უცხოელების სიკვდილი მოჰყვა, შტურმი მიიტანეს მებრძოლთა თავშესაფარზე, რომელიც „ისლამურ სახელმწიფოსთან“ ალიანსში მყოფ შიდა ისლამისტურ დაჯგუფებას ეკუთვნოდა.

შაბათს სადესანტო-დივერსიულმა რაზმებმა ხუთსართულიან შენობაში მომწყვდეული 78 ადამიანი გადაარჩინეს.