ნოდარ ხადურის განცხადებით, წელს 5%-იანი ეკონომიკური ზრდის მიღწევა გაჭირდება, თუმცა მისი თქმით, „ბევრი რამ აჩვენებს, რომ ეკონომიკური ვითარება ქვეყანაში გაუმჯობესდა“, თუმცა მისივე თქმით, „მსოფლიოში ცხოვრების დონით 114-ე ადგილზე ვართ, ასე ვიყავით შევარდნაძის დროს, სააკაშვილის დროს და სამწუხაროდ, დღესაც ასე ვართ“, ამის შესახებ ხადურმა „კვირის პალიტრასთან“ ინტერვიუში ისაუბრა.  


ჟურნალისტის შეკითხვაზე - რუსეთისა და უკრაინის ვითარებიდან გამომდინარე, ხომ იყო შესაძლებელი გათვლა, როგორი იქნებოდა მათი პრობლემების გავლენა საქართველოზე? - ფინანსთა მინისტრმა ასე უპასუხა:  


„რუსეთისა და უკრაინის გავლენა საქართველოს ეკონომიკასა და განსაკუთრებით, ექსპორტზე, მხოლოდ 15%-ია. სულ რომ ჩაკეტილიყო ეს ორი ბაზარი ჩვენთვის და ამ ორ ქვეყანასთან არანაირი სავაჭრო ურთიერთობები არ გვქონოდა, ეკონომიკური ზრდის მაჩვენებელი 5%-ის ნაცვლად 4%-ზე უნდა დაგვეგეგმა. როგორ ფიქრობთ, ოქტომბერში, ნოემბერში, დეკემბერში, როცა ჩვენ ბიუჯეტზე ვმუშაობდით და მუშაობდნენ სავალუტო ფონდშიც, რუსეთისა და უკრაინის ეკონომიკასაც ხომ აკვირდებოდნენ? ისინიც დაგვეთანხმნენ, რომ სავსებით რეალისტური იყო 5%-იანი ეკონომიკური ზრდა“.

ნოდარ ხადურის თქმით, „5%-იანი ეკონომიკური ზრდის მაჩვენებელი ოფიციალურად ჯერ არ არის შეცვლილი“, მაგრამ, აკონკრეტებს მინისტრი, „ჩვენ ვფიქრობთ, რომ 5%-იანი ეკონომიკური ზრდის მიღწევა გაჭირდება. იანვარში ეკონომიკური ზრდა იყო დაახლოებით 0,5%. ეს ცუდი მაჩვენებელია. თებერვალში დღგ-ის გადამხდელი საწარმოების ბრუნვა 15%-ზე მეტით გაიზარდა. ეს ნიშნავს, რომ ეკონომიკური ზრდა მინიმუმ 4-4,5% იქნება თებერვალში. ბევრი რამ აჩვენებს, რომ ეკონომიკური ვითარება ქვეყანაში გაუმჯობესდა. გასულ წელს 1,3 მილიარდი დოლარის ინვესტიცია განხორციელდა. საქართველოს ასეთი მაჩვენებელი 2008 წლის ომის შემდეგ არ ჰქონია... მსოფლიოში ცხოვრების დონით 114-ე ადგილზე ვართ. ასე ვიყავით შევარდნაძის დროს, სააკაშვილის დროს და სამწუხაროდ, დღესაც ასე ვართ. არაფერი შეცვლილა იმ 9 წელიწადში, ასე რომ გვაყვედრიან და ყელში ამოგვიყვანეს,“ განაცხადა გაზეთის ჟურნალისტთან საუბრისას ფინანსთა მინისტრმა.