სიღნაღის მუნიციპალიტეტისთვის 2017 წელს რეგიონული ფონდიდან გამოყოფილმა თანხამ 2 მილიონ 903 000 ლარი შეადგინა, საიდანაც ადგილობრივი ბიუჯეტის თანადაფინანსების ხარჯზე, 20% მოდის. ამის შესახებ Guardian.ge-ს სიღნაღის მუნიციპალიტეტის გამგებელმა, დავით ჯანიკაშვილმა განუცხადა.

მისი თქმით, ადგილობრივი ხელისუფლება ბოლო ორი წლის განმავლობაში ძირითად აქცენტს სასმელი წლის სისტემისა და საბავშვო ბაღების კეთილმოწყობაზე აკეთებს. „დაგვრჩა ორი ბაღი და წელს გათვალისწინებული გვაქვს ორივე ბაღის გაკეთება. ჯუგაანში ახალი საბავშო ბაღის მშენებლობაა დაგეგმილი, მისი სატენდერო ღირებულება 400 000 ლარია - ანაგაში კი, საბავშვო ბაღის შენობის აღდგენა მოხდება. ფაქტობრივად, სიღნაღის 24 ბაღიდან 24-ვე კაპიტალურად არის გარემონტებული, 22 ბაღში არის ცენტრალური გათბობა მაშინ, როდესაც დაახლოებით, 2-3 წლის წინათ ყველა შეშის ღუმელით თბებოდა. წელს ბაღების საკითხი სრულად ამოიწურება“, განაცხადა დავით ჯანიკაშვილმა, რომლის ინფორმაციითაც მიმდინარე წელს გათვალისწინებულია ოთხი ჭაბურღილის მშენებლობა.

„თითოეული ჭაბურღლის მშენებლობას 70 000-90 000 სჭირდება. მიწა 200 მეტრზე იბურღება და სასმელი წყალი ამოდის. ჭაბურღილების მშენებლობასთან ერთად, მოგეხსენებათ, კეთდება ხოლმე დაქსელიანებაც და ერთი ჭაბურღილიდან, დაახლოებით, 50-60 კომლს მიეწოდება წყალი“, აღნიშნა სიღნაღის გამგებელმა და დაამატა, რომ ახალგაზრდების მოთხოვნის შესაბამისად სოფლებში მინი-სტადიონების მშენებლობა გაგრძელდება, ასევე მოწესრიგდება შიდა გზები.

„წელს დაგეგმილია ახალი რვა მინი-სტადიონის მოწყობა სოფლებში - ბოდბე, მაღარო, ნუკრიანი, ძველი ანაგა, მაჩხაანი, ტიბაანი, წნორი.

წელსვე, დაგეგმილია შიდა სამიმოსვლო გზების გაკეთება. მიმდინარე წელს, დაახლოებით, 4-5 კმ გზა გაკეთდება მთლიანობაში. წნორში ყველაზე დიდი გზა კეთდება, რომლის სატენდერო ღირებულება 500 000 ლარზე მეტია. გზა კეთდება ასევე სოფელ მაღაროში, ვაქირში და ა.შ“.

სიღნაღის მუნიციპალიტეტის გამგებელი აცხადებს, რომ აღნიშნული მსხვილი ინფრასტრუქტურული პროექტების გარდა, ადგილობრივი ბიუჯეტიდანაც გათვალისწინებულია სხვადასხვა პროექტის განხორციელება, რომელთა ჯამური ღირებულება მილიონ 300 000 ლარამდეა.

„ეს თანხა მოხმარდება სასოფლო-სამეურნეო სავარგულებთან მისასვლელი გზების მოხრეშვას, სასმელი წყლის შიდა ქსელების მოწყობას. სამუშაოები მოსახლეობის გამოკითხვისა და კრებების ოქმების საფუძველზე იგეგმება. იმის გამო, რომ სოფლის მხარდაჭერის პროგრამა აღარ გვაქვს, გავითვალისწინებთ მოსახლეობის სურვილებსა და საჭიროებებს, ადგილობრივი ბიუჯეტიდან.

პროექტების 70%-ზე ტენდერები გამოცხადებულია, დანარჩენებზე უახლოეს პერიოდში გამოცხადდება და მაქსიმუმ ერთ თვეში, სამუშაოები დასრულდება. გარდამავალი პროექტი არც ერთი არ გვაქვს, შესაბამისად, ყველა ინფრასტრუქტურული ღონისძიება მიმდინარე წელს, სავარაუდოდ, აგვისტოში დასრულდება“, განუცხადა Guardian.ge-ს დავით ჯანიკაშვილმა.