ტყიბულის სპორტის სასახლე სპორტული ინვენტარით აღიჭურვა. უმაღლესი ხარისხის, იტალიური წარმოების კალათბურთის ფარები, ელექტრო ტაბლო, ე.წ. ორი 24 წამიანი „შოთქლოქი“, ხელბურთისა და მინი ფეხბურთის კარები, ტყიბულის მუნიციპალიტეტის გამგებელმა რობიზონ გვენეტაძემ დაათვალიერა და სამონტაჟო სამუშაოებს დაესწრო.

ამის შესახებ Guardian.ge-ს ტყიბულის მუნიციპალიტეტის გამგეობიდან აცნობეს.

გამგეობის პრესსამსახურის ინფორმაციით, აღნიშნული სპორტული ინვენტარის შესაძენად ადგილობრივი ბიუჯეტიდან 73 800 ლარი გამოიყო და მის უსაფრთხოებაზე, მდგრადობასა და ხარისხზე პასუხისმგებელობას ტენდერში გამარჯვებული კომპანია „სპორტული სტრუქტურები“ იღებს.

სპორტის სასახლეში ასევე ფუნქციონირება დაიწყო ფიტნეს ჯგუფმა, რომელიც დაკომპლექტებულია „ასპრიას“ 21 სახეობის სპორტული ინვენტარით. მათ შორის არის თხილამურები, ველოსიპედები, სარბენი ბილიკები და ძალოსნობისათვის განკუთვნილი შესაბამისი აღჭურვილობა.

„ფიტნეს ჯგუფით 15 დღით სარგებლობის ღირებულება 40 ლარს შეადგენს, ხოლო დამატებით ორთქლის აბანოთი სარგებლობის შემთხვევაში მომსახურეობის ღირებულება 50 ლარი იქნება. ახლო მომავალში, ასევეა დაგეგმილი სპორტის სასახლის მისასვლელი გზის ბეტონის საფარით მოწყობა.

ტყიბულის სპორტის სასახლე უკვე მზად არის, შესაბამის სახეობებში, უმაღლესი რანგის თამაშების ჩასატარებლად“, აცხადებენ ტყიბულის მუნიციპალიტეტის გამგეობაში.