თერჯოლის მუნიციპალიტეტის გამგეობის სხდომათა დარბაზში გამგებლის მოვალეობის შემსრულებლის, თემურ ქოჩიაშვილის თავმჯდომარეობით გამართულ თათბირზე მუნიციპალიტეტისთვის აქტუალური თემები, მათ შორის ბუნებრივი აირის გარეშე დარჩენილი სოფლების გაზიფიცირებისა და ტურიზმის განვითარებასთან დაკავშირებული საკითხები განიხილეს.

თერჯოლის გამგეობის პრესსამსახურის ინფორმაციით, მუნიციპალიტეტის პირველმა პირმა შეკრებილებს თერჯოლისა და ტყიბულის გაერთიანებული მაჟორიტარული ოლქის დეპუტატის, ელგუჯა გოცირიძის ინიციატივითა და ფინანსური მხარდაჭერით შექმნილი პროექტი გააცნო, რომელიც ტურიზმის განვითარებას ისახავს მიზნად.

„ტყიბულისა და თერჯოლის გაერთიანებული ოლქის მაჟორიტარი დეპუტატის, ელგუჯა გოცირიძის ინიციატივითა და ფინანსური მხარდაჭერით თერჯოლასა და ტყიბულში უპრეცედენტო პროექტი განხორციელდება, რაც ტურისტული პოტენციალის გაზრდას შეუწყობს ხელს. „ნიუ-სტუდიოს“ მიერ გადაღებული იქნა იმ 7 ტურისტული ობიექტის საიმიჯო კლიპი, რომელთა ინფრასტრუქტურის მოწყობაც იგეგმება. განსაკუთრებით აღსანიშნავია ის ფაქტი, რომ ინფრასტრუქტურის მშენებლობისა და შემდგომში ფუნქციონირებისათვის საჭირო მომსახურე პერსონალი ადგილობრივი მოსახლეობიდან შეირჩევა“, განაცხადა თემურ ქოჩიაშვილმა და პარლამენტის წევრის, ელგუჯა გოცირიძის კიდევ ერთ „დამსახურებას“ გაუსვა ხაზი.

„ელგუჯა გოცირიძის კიდევ ერთი დამსახურება ის გახლავთ, რომ გაზიფიცირების დროს გამორჩენილი 5 სოფლის გაზიფიკაციის სამუშაოებისათვის საჭირო საპროექტო-სახარჯთარიცხვო დოკუმენტაციის მომზადება დაჩქარებული ტემპით წარიმართა და უახლოეს მომავალში სამუშაოების დაწყებაც იგეგმება“, განაცხადა თერჯოლის მუნიციპალიტეტის პირველმა პირმა და გამგებლის წარმომადგენლებს ზემოთ აღნიშნული ინფორმაციის მოსახლეობამდე მიტანა დაავალა.

თერჯოლის მუნიციპალიტეტის გამგეობის პრესსამსახურის ინფორმაციით, თათბირზე ასევე განიხილეს სხვა, ამ ეტაპზე მუნიციპალიტეტისათვის აქტუალური საკითხები. თემურ ქოჩიაშვილმა როგორც სამსახურის უფროსებს, ასევე თითოეული ადმინისტრაციული ერთეულის წარმომადგენელს მოუსმინა და კონკრეტული დავალებები გასცა მუნიციპალიტეტში არსებული პრობლემების აღმოსაფხვრელად.

სხდომას გამგებლის მოადგილეები კახაბერ კუპატაძე და ნუკრი სარდანაძე, სამსახურის უფროსები, ადმინისტრაციულ ერთეულებში გამგებელის წარმომადგენლები და ტყიბულისა და თერჯოლის გაერთიანებული ოლქის მაჟორიტარი დეპუტატის, ელგუჯა გოცირიძის ბიუროს წარმომადგენლები ესწრებოდნენ.