სამაუწყებლო კომპანია „რუსთავი 2“-ის გენერალური დირექტორის მოადგილის, საინფორმაციო პროგრამა „კურიერის“ წამყვანის ზაალ უდუმაშვილის მიერ თბილისის მერის არჩევნებში „ნაციონალური მოძრაობის“ რიგებიდან შესაძლო კენჭისყრასთან დაკავშირებით გავრცელებულ ინფორმაციას საქართველოს პარლამენტის თავმჯდომარე გამოეხმაურა.

„თბილისის მერის თანამდებობაზე არა მარტო ზაალ უდუმაშვილს, არამედ ოპოზიციის არც ერთ კანდიდატს არ აქვს შანსი. ეს საუბრები, ალბათ, მიუთითებს იმაზე, რომ „ნაციონალურ მოძრაობას“ თვითონ ეშინია თავიანთი „ბრენდის“, თუკი ისინი აპირებენ, რომ კანდიდატად წამოაყენონ ზაალ უდუმაშვილის კანდიდატურა. რაც შეეხება ჩვენს გეგმებს, ჩვენ დავასახელებთ კანდიდატს მას შემდეგ, რაც პოლიტსაბჭოს მიერ მიიღება შესაბამისი გადაწყვეტილება. პროგრამა მინიმუმი გვაქვს პირველ ტურში გამარჯვება - თუ ჩვენი კანდიდატი იქნება კახი კალაძე, ეს პროგრამა მინიმუმი იქნება უპირობოდ შესრულებული, ყოველგვარი განსაკუთრებული სირთულეების გარეშე“, აცხადებს ირაკლი კობახიძე.

ზაალ უდუმაშვილი, რომელიც კიევიდან დაბრუნდა, ადასტურებს ინფორმაციას იმის შესახებ, რომ უკრაინის დედაქალაქში საქართველოს ყოფილ პრეზიდენტთან, მიხეილ სააკაშვილთან გამართული შეხვედრისას მისი თბილისის მერის არჩევნებში მონაწილეობის საკითხი განიხილებოდა, თუმცა აცხადებს, რომ მას ჯერ არ აქვს გადაწყვეტილება მიღებული, იქნება თუ არა „ნაციონალური მოძრაობის“ მერობის კანდიდატი დედაქალაქში.