ერაყის ქალაქ მოსულის სიახლოვეს, იძულებით გადაადგილებულ პირთა ბანაკში საკვების მოწამვლისაგან ასეულობით ადამიანი გახდა ცუდად და ერთი ბავშვი და ქალი გარდაიცვალა.

BBC-ის ცნობით, ადამიანებს ღებინება დ გაუწყლოება აღენიშნებათ. გაერო-ს ლტოლვილთა სააგენტომ განაცხადა, რომ 800 ადამიანი იმყოფება ცუდად და აქედან 200 საავადმყოფოშია გადაყვანილი.

გაერო-ს სააგენტო „უკიდურეს წუხილს“ გამოხატავს ბანაკში შექმნილი მდგომარეობით.

„ჩვენი თანამშრომლები მთელი ღამის განმავლობაში მჭიდრო კოორდინირებით მუშაობდნენ სხვა სააგენტოებთან და სხვა სათანადო ორგანოებთან იმისათვის, რომ დროული რეაგირება მოეხდინათ და უზრუნველეყოთ ის ადამიანები სამედიცინო დახმარებით, ვინც ავად გახდა და სერიოზულ მდგომარეობაში მყოფებისთვის საავადმყოფოში გადასაყვანად ტრანსპორტი გამოენახათ“, ნათქვამი განცხადებაში.

საკვები, რომელიც შეიცავდა ლობიოს, ქათამს და იოგურტს, ირბილის რესტორანში მომზადდა და ბანაკში ყატარის საქველმოქმედო ორგანიზაციამ მიიტანა, წერს „რუდავის“ ახალი ამბების სააგენტო.

ბანაკის ხელმძღვანელის, რიზგარ ობედის თქმკით, უწინ გარე ორგანიზაციებს ეკრძალებოდათ საკვების ბანაკში შეტანა, მაგრამ ბანაკის მმართველობა „დიდი ზეწოლის შედეგად“ იძულებული გახდა შეეცვალა რეგულაციები.

ავად გამხდარ ადამიანებს მკურნალობა სამ სხვადასხვა საავადმყოფოში უტარდებათ, რესტორნის მფლობელი კი დაპატიმრებულია, იუწყება BBC სააგენტო „რუდავზე“ დაყრდნობით.

ბანაკი, რომელიც მძიმე ბრძოლების ეპიცენტრად ქცეული მოსულის მიდებარე ტერიტორიაზეა აშენებული, მოსულიდან და ახლომდებარე სოფლებიდან იძულებით გადაადგილებულ პირთათვის არის განკუთვნილი და ამჟამად იქ 6, 235 ადამიანი იმყოფება.