„რესპუბლიკური პარტიის“ ყოფილმა ლიდერმა და საქართველოს პარლამენტის ყოფილმა თავმჯდომარემ, დავით უსუფაშვილმა ახალი პოლიტიკური ძალის, „შენების მოძრაობის“ ჩამოყალიბებაზე გააკეთა განცხადება. მან თქვა, რომ მისი პოლიტიკური გაერთიანების, რომლის მთავარი ცნობადი პოლიტიკური სახეები, კახა შარტავა, რევაზ შავიშვილი და ვახტანგ ხმალაძე იქნებიან, უმთავრესი მიზანი 2020 წლის საპარლამენტო არჩევნებში უმრავლესობით მოსვლა იქნება.

მან დაასახელა პარტიის ახალი სახეები, რომლებიც მისი თქმით, „გაიზარდნენ ახალ, თავისუფალ საქართველოში და თავისუფალი არიან ჩვენი იმ წარსულის მავნე გადმონაშთებისგან, რომელიც არ ასვენებს ჩვენ ქვეყანას და არ გვაძლევს საშუალებას წინ წავიდეთ და გავაკეთოთ ის, რაც ქვეყანას სჭირდება“.

უსუფაშვილმა თქვა, რომ მათი მოძრაობა იქნება „მტკიცე თავის გეგმაში“. „ჩვენ კალაპოტიდან ვერ ამოგვაგდებს მიმდინარე პოლიტიკური კონიუნქტურა, რომელმაც არაერთ პოლიტიკურ წამოწყებას შეუშალა ხელი საქმის კეთებაში. ჩვენ მტკიცე ნაბიჯებით გავივლით მარათონულ დისტანციას და 2020 წლის საპარლამენტო არჩევნებზე გავიმარჯვებთ“, განაცხადა დავით უსუფაშვილმა.