„რუსთავი 2“-ის საინფორმაციო პროგრამა „კურიერის“ მთავარი გამოშვების წამყვანმა, ზაალ უდუმაშვილმა პოლიტიკაში წასვლის გადაწყვეტილება მიიღო და ამის შესახებ თავად გამოაცხადა 9 საათიანი საინფორმაციო გამოშვების დასასრულს. მან აღნიშნა, რომ ეს არის მისი ბოლო მიმართვა მაყურებლისადმი, როგორც კურიერის“ წამყვანის და დასძინა, რომ მიდის „იმ ბრძოლაში, რომელიც ქვეყანაში ტოტალურ განუკითხაობას და ერთი კაცის მმართველობას დაასრულებს“ და თბილისის მერის არჩევნებში დაამარცხებს „ივანიშვილის კორუმპირებულ და ანტიდემოკრატიულ რეჟიმს“.

„ეს არის ჩემი ბოლო მიმართვა მაყურებლისადმი, როგორც „კურიერის“ წამყვანის. დღეს მე 25-წლიან სატელევიზიო კარიერას ვასრულებ, თუმცა თქვენთან ურთიერთობას უკვე არა ეკრანიდან, არამედ უშუალო ურთიერთობით განვაგრძობ.

„ჩვენ, ამიერიდან, სატელევიზიო ეკრანი აღარ გაგყვყოფს. მე მივიღე გადაწყვეტილება და მივდივარ პოლიტიკაში. როგორც ჟურნალისტი მთელი ამ წლების განმავლობაში, მე თქვენი ყოველდღიური სტუმარი ვიყავი და გაწვდიდით ინფორმაციას ამ ქვეყანაში მიმდინარე მოვლენების შესახებ. თუმცა ახლა ვთვლი, რომ დადგა დრო, როდესაც თავად უნდა გავხდე პოლიტიკური პროცესების აქტიური მონაწილე და ჩემი წვლილი შევიტანო იმ ბრძოლაში, რომელიც ქვეყანაში ტოტალურ განუკითხაობას და ერთი კაცის მმართველობას დაასრულებს. ბრძოლის გამოცდილება კი მაქვს. გავიარე ძალიან საინტერესო წლები, როგორც ჟურნალისტმა და ამავე დროს შევიძინე უზარმაზარი გამოცდილება, თუ როგორ უნდა ებრძოლო უსამართლობას.

„მე „რუსთავი 2-ის“ გუნდთან და თქვენთან ერთად ერთხელ უკვე გავიმარჯვე ამ ხელისუფლებასთან სრულიად უთანასწორო ბრძოლაში. თუმცა ქვეყანას ჯერ მთავარი ბრძოლა წინ აქვს და მე ვაპირებ თქვენთან ერთად და თქვენი სახელით შევიდე ამ ბრძოლაში და კიდევ ერთხელ გავიმარჯვო და ამჯერად, თბილისის მერის არჩევნებში დავამარცხო ივანიშვილის კორუმპირებული და ანტიდემოკრატიული რეჟიმი.

„ბოლოს მე მინდა მადლობა ვუთხრა ყველა „რუსთავი 2-ელს“ იმ წლებისთვის, რომელიც მე აქ გავატარე და დარწმუნებული ვარ ეს ტელევიზია კიდევ უფრო წარმატებული იქნება, რადგან აქ ყველაზე მებრძოლი და რაც მთავარია პროფესიონალი გუნდი მუშაობს და რა თქმა უნდა უდიდესი მადლობა თქვენ, მაყურებელს, რომლის თანადგომასაც მთელი ამ წლების განმავლობაში ვგრძნობდი. მე თქვენთვის ვმუშაობდი როგორც ჟურნალისტი და თქვენს სამსახურში ვიქნები მომავალშიც პოლიტიკაში“, განაცხადა ზაალ უდუმაშვილმა, რომელსაც არ დაუკონკრეტებია თუ რომელი პოლიტიკური ძალის კანდიდატი იქნება თბილისის მერის პოსტზე, თუმცა ცოტა ხნის წინათ მის მიერ კიევში საქართველოს ყოფილ პრეზიდენთან, მიხეილ სააკაშვილთან გამართული კონსულტაციებიდან გამომდინარე, სავარაუდოა, რომ იგი დიდი ალბათობით „ერთიანი ნაციონალური მოძრაობის“ კანდიდატად იქნება დასახელებული.