ასპინძის მუნიციპალიტეტში ორი სოფლის გარდა, მაღალმთიანი დასახლების სტატუსი ყველა სოფელს, მათ შორის დაბასაც მიენიჭა. ჯამში, მუნიციპალიტეტში ამ სტატუსის მატარებელი 22 სოფელია.

მაღალმთიანი რეგიონების განვითარების შესახებ კანონის ამოქმედებას „კარგ იდეად“ მიიჩნევს ასპინძის მუნიციპალიტეტის გამგებელი ლევან ცაბაძე, თუმცა ამბობს, რომ მას „ცოტა დახვეწა სჭირდება პრაქტიკაში“.

„წესით და რიგით, ამ კანონმა ხელი უნდა შეუწყოს მოსახლეობის ადგილზე დამაგრებას. მე ვფიქრობ, რომ ეს კარგი იდეაა, თუმცა, ცოტა დახვეწა სჭირდება პრაქტიკაში. მთლიანობაში კი, კანონი იმდენ სფეროს მოიცავს, საკმაოდ საინტერესო რაღაცების გაკეთება შეიძლება. რაც შეეხება აღნიშნული კანონის ერთ-ერთ მიზანს, ადგილზე მოსახლეობის დამაგრებისა და მათი უკან მობრუნების შესახებ, მე არა მგონია, რომ ახალგაზრდობის შემთხვევაში ასე მოხდეს, თუმცა, ასაკიანი ხალხის შემთხვევაში კი. მე მიმაჩნია, რომ ახალგაზრდობა რომ დაკავდეს ადგილზე, ამისთვის ცოტა მეტი რაღაცების გაკეთებაა საჭირო, მათ სტიმულირება სჭირდებათ, სამუშაო ადგილები სჭირდებათ. არის რაღაცების მოფიქრება საჭირო“, უთხრა Guardian.ge-ს ლევან ცაბაძემ, რომლის აზრითაც რეგიონებში ისეთი საწარმოებია გასაკეთებელი, რომლებიც ადამიანების მასობრივ დასაქმებას შეუწყობს ხელს.

„როდესაც ეს ყველაფერი იქნება ხელმისაწვდომი მოსახლეობისთვის, მე ვფიქრობ, რომ ახალგაზრდა ისეთ შემთხვევაში თუ წავა და დატოვებს რეგიონს, როცა ეს იქნება ან სწავლა-განათლებისთვის ან სხვა რაიმე წარმატების მისაღწევად - ლუკმა-პურის საშოვნელად აღარ წავა. ჩვენს მუნიციპალიტეტში რძის გადამამუშავებელი, ხილის გადამამუშავებელი საწარმოებია გასაკეთებელი. რა თქმა უნდა, ეს კერძო სექტორის გასაკეთებელია, მაგრამ მთავრობამ აუცილებლად უნდა გაუკეთოს სტიმულირება ამას. ადგილობრივი თვითმმართველობა ინფრასტრუქტურით ვცდილობთ რომ ხელი შევუწყოთ აღნიშნულს. მალე ალბათ, პირველი მუნიციპალიტეტი ვიქნებით, სადაც არ იარსებებს სოფელი, სადაც კეთილმოწყობილი გზა არ იქნება“, აცხადებს ლევან ცაბაძე.