ევროკომისიის პრეზიდენტმა ჟან-კლოდ იუნკერმა მწვავე თავდასხმა წამოიწყო ევროპული პარლამენტის წევრებზე.

სტრასბურგში, თითქმის ცარიელ საპარლამენტო დარბაზში მან ვეროპარლამენტი გამოაცხადა, როგორც „სასაცილო, სრულიად სასაცილო“, იუწყება BBC, რომლის ცნობითაც, დარბაზში დაახლოებით, მხოლოდ 30 ევროპარლამენტარის ყოფნამ იუნკერი გააღიზიანა. მისი თქმით, ამან დაადასტურა ის, რომ პარლამენტი „არ არის სერიოზული“.

ევროპარლამენტს ჯამში 751 დეპუტატი ჰყავს.

პარლამენტის პრეზიდენტმა ანტონიო ტაიანიმ იუნკერის მიმართ მრისხანე რეაქცია გამოხატა და ბრალი დასდო მას იმაში, რომ ეს მის მიმართ უპატივცემულობის გამოხატულებაა.

„შენ შეიძლება გააკრიტიკო პარლამენტი, მაგრამ კომისრის მოვალეობა არაა პარლამენტის კონტროლი - ეს პარლამენტია, რომელმაც უნდა გააკონტროლოს კომისია“, თქვა მან.

მაგრამ შეხლა-შემოხლა გაგრძელდა. იუნკერმა, რომელიც ევროკავშირის აღმასრულებელი ორგანოს ხელმძღვანელია, გაბრაზებით უსაყვედურა პარლამენტის წევრებს იმ სხდომაზე დაუსწრებლობის გამო, რომელიც მალტის, ბლოკის ყველაზე პატარა წევრი სახელმწიფოს, ექვსთვიანი პრეზიდენტობის საკითხს განიხილავდა.

BBC წერს, რომ ბოლო წლების განმავლობაში, ეს იყო ყველაზე ღვარძლიანი საჯარო სკანდალი ევროკავშირის ოფიციალურ პირებს შორის.

როგორც ბრიტანელმა ევროპარლამენტარმა BBC-ს უთხრა, სესიაზე მისი კოლეგების დაუსწრებლობის მიზეზი შესაძლოა ისიცაა, რომ „ზოგიერთი უკვე თავის 7-კვირიან ხელფასიან შვებულებაში გავიდა“. ანდა, წერს BBC, რომ ეს შესაძლოა იმ ფაქტს უკავშირდებოდეს, რომ ამ სხდომის ზოგიერთი დებატები გაუქმდა, რათა პოლიტიკოსებს შესაძლებლობა ჰქონდეთ დაესწრონ სიმონე ვეილის - პარლამენტის ყოფილი პრეზიდენტის - დასაფლავებას, ოთხშაბათს, საფრანგეთში.