აზერბაიჯანელი ჟურნალისტის, აფგან მუხთარლის მეუღლე ლეილა მუსტაფაევა დღეს მთავარ პროკურატურაში გამოკითხვაზე იმყოფებოდა.

როგორც გამოკითხვიდან გამოსულმა მუსტაფაევამ ჟურნალისტებთან საუბრისას განაცხადა, „იგივე კითხვები დამისვეს, რაც თავის დროზე პოლიციამ დამისვა. მე ყველა კითხვას განმეორებით პასუხი გავეცი".

„მათ ასევე შევახსენე, რომ პოლიცია ასე სვამდა კითხვებს, თუმცა, შემდეგ არაფერი გაუკეთებიათ. მთავარი, რაც მათ ვთხოვე იყო ის, რომ გამოიძიონ თუ რატომ არის, რომ კამერები ჩვენი სახლიდან საზღვრამდე არ მუშაობდა, ვინ იყო ამაზე პასუხისმგებელი, რატომ გადაკვეთა აფგან მუხთარლიმ საზღვარი უპასპორტოდ, რატომ არ შეაჩერა ის სასაზღვრო პოლიციამ. ვთხოვე სწრაფი და ობიექტური გამოძიება ჩაატარონ. მალე დავინახავთ, აქვთ თუ არა ამისი ნება.... დამატებით მათ მივმართე, რომ გამოავლინონ ის სახელმწიფო მოხელეები, რომლებიც ჩართულნი იყვნენ აფგან მუხთარლის გატაცებაში, რომ მოხდეს მათ წინააღმდეგ სისხლის სამართლის საქმის აღძვრა და დაკითხვა “, განაცხადა მუსტაფაევამ.