ავღანეთის თავდაცვის სამინისტრომ ოთხშაბათს განაცხადა, რომ სულ მცირე 26 ჯარისკაცი დაიღუპა სამხრეთ ყანდაღარის პროვინციის სამხედრო ბაზაზე თალიბანის მიერ განხორციელებული თავდასხმისას. ინფორმაციას „ფრანს პრესი“ ავრცელებს.

ავღანურმა საჰაერო ძალებმა განაცხადა, რომ მან სახმელეთო ბრძოლაში, რომელიც გვიან სამშაბათს დაიწყო და ოთხშაბათს დილით დასრულდა, საათების განმავლობაში ჩართული ჯარისკაცების მხარდასაჭერად დარტყმები განახორციელა.

თავდაცვის მინისტრის სპიკერმა, გენერალმა დავლათ ვაზირიმ განაცხადა, რომ დაახლოებით 13 ჯარისკაცი დაშავდა ბრძოლის დროს. ავღანური ძალები „მამაცურად ეწინააღმდეგებოდნენ“ მტერს. მანვე დაამატა, რომ დაახლოებით 80 მეამბოხე შეეწირა ამ თავდასხმას.

„ფრანს პრესის“ ცნობით, სამხედრო ბაზა იმყოფებოდა მოწყვეტილი ქარძალის მხარეში, ხაკრეზის გარეუბანში, სადაც თალიბანს ეკავა ვრცელი ტერიტორია.

„ჩვენ განვახორციელეთ რამოდენიმე საჰაერო თავდასხმა და ათეულობით მეამბოხე დავხოცეთ. სამაშველო ვერტმფრენებს დაჭრილი მეომრები ყანდაღარის საავადმყოფოში გადაჰყავდათ“, განაცხადა გენერალმა რაზიქ შირზაიმ, პროვინციული საჰაერო ძალების სარდალმა.

ერთ-ერთი მთავარი სამხედრო წყაროს თქმით, 12 ან მეტი ჯარისკაცი კვლავ დაკარგულად ითვლება. მანვე ეს თავდასხმა აღწერა როგორც „ძალიან ძლიერი თავდასხმა“.

მეამბოხეებმა უკან დახევისას მოიპარეს იარაღი და ავტომობილები, თქვა მან.

ადგილობრივი მოსახლეობის თქმით, მათ გაიგეს საჰაერო დაბომბვის ხმები და დაამატეს, რომ თალიბანის 30 მეამბოხეთა ჯგუფი სხვადასხვა მხრიდან ესხმოდა თავს ბაზას.

მეამბოხეებმა თავდასხმაზე პასუხისმგებლობა „ტვიტერის“ მეშვეობით აიღეს.

როგორც SIGAR-ში (ავღანური რეკონსტრუქციის სპეციალური სადამკვირვებლო სააგენტო) აღნიშნეს, ავღანურ თავდაცვის ძალებში მსხვერპლი 2016 წლისთვის 35% გაიზარდა, დაღუპულია 6,800 ჯარისკაცი და პოლიციელი.

მეამბოხეებმა უფრო ძლიერი თავდასხმები განახორციელეს 2017 წელს. ავღანური რეკონსტრუქციის სპეციალური სადამკვირვებლო სააგენტო წლის დასაწყისში მომხდარ საბედისწერო ინციდენტების რაოდენობას „შოკისმომგვრელად მაღალს“ უწოდებს.