“სამართალდამცავები მოსულები იყვნენ და ალბათ დაწყებულია გამოძიება, თუმცა დეტალურად ინფორმაციას არ ვფლობ”, – ამის შესახებ გურჯაანის გამგებელმა გივი გერგაძემ გურჯაანის გამგეობაში წუხელ და გუშინ მთელი დღის განმავლობაში მომხდარი ინციდენტების კომენტირებისას განაცხადა.

 

გურჯაანის გამგებლის თქმით, გუშინ “ნაციონალური მოძრაობის” წევრებმა გამგეობის მუშაობაში ხელის შეშლა რამდენჯერმე სცადეს, რის შემდეგაც ადგილზე სამართალდამცავები გამოიძახეს.

 
“გუშინ დილით ჩვეულებრივ დავიწყეთ 10 საათიდან მოქალაქეების მიღება. ზოგს პირადი, ზოგს სოციალური პრობლემები ჰქონდა. შემოვიდა ერთი მოქალაქე, რომელსაც ჩართული კამერებით “ნაციონალური მოძრაობის” წარმომადგენლები შემოყვნენ. ამ ქალბატონს “ნაციონალები” კარნახობდნენ რა უნდა ეთქვა, თუმცა გაირკვა, რომ ამ ქალბატონის პრობლემები ჩვენი გადასაწყვეტი არ იყო და გაუგებარ მოთხოვნებს აყენებდა. ამ დროს კამერების უკან ვიღაც უცხო პირები გამოჩნდნენ, რომლებიც “ნაციონალური მოძრაობის” წარმომადგენლებთან იყვნენ. მათ სიტყვიერი შეურაცხყოფა მეც მომაყენეს და ჩემს თანაშემწესაც, რომელიც მოქალაქეებთან მიღებებს ესწრება ხოლმე. ამის შემდეგ ფიზიკურ შეურაცხყოფაზე გადავიდნენ.

 
“ნაციონალური მოძრაობის” წარმომადგენლებმა აღარ მოგვცეს საშუალება, რომ მოქალაქეებთან მიღება გაგვეგრძელებინა. რის შემდეგაც, ჩვენ ადგილზე პოლიცია გამოვიძახეთ. ამის შემდეგ ღვინიაშვილი და თარხნიშვილი შემოვიდნენ კაბინეტში. მე ვუთხარი, რომ თუ რაიმე კითხვა ჰქონდათ მე შემეძლო პასუხის გაცემა. ისინი თითქოს კომისიის ფარგლებში იყვნენ შემოსული, რაზეც მე ვუპასუხე, რომ ყველა ინფორმაცია საჯაროა”, – განაცხადა გურჯაანის გამგებელმა.

 
გივი გერგაძემ “ნაციონალური მოძრაობის” წევრების გურჯაანის გამგეობის შენობიდან გაყვანის შესახებ განაცხადა, რომ ოპოზიციური პარტიის წევრები გამგეობის შენობაში უკანონოდ იყვნენ და რომ მათი შენობიდან გაყვანა კავშირში არ იყო დღის განმავლობაში მათთან მომხდარ დაპირისპირებასთან.

 
“ჩვენ მიწერილი გვქონდა სამჯერ, რომ “ნაციონალური მოძრაობის” წევრები ფართში იყვნენ უკანონოდ. ხელშეკრულება 2013 წლის ზაფხულში იყო დამთავრებული. არანაირი იჯარა და ხელშეკრულება არ არსებობდა. “ნაციონალური მოძრაობის” წევრები ჩვენივე შენობაში არიან მესამე საერთულზე. ჩემი კაბინეტის გვერდით არის კაბინეტი, სადაც იყვნენ ხოლმე დეპუტატები. როდესაც კანონი შეიცვალა და ხელშეკრულება დაუმთავრდათ ისინი უნდა წასულიყვნენ. არაფერს არ ვუკავშირებ ჩვენს მოთხოვნას ფართის დატოვების შესახებ. როდესაც მოქალაქეებთან შეხვედრა შეაფერხეს “ნაციონალური მოძრაობის” წევრებმა, თვითონ მოსახლეობას გაუჩნდა პრეტენზიები და მათ მოითხოვეს, რომ წასულიყვნენ ამ შენობიდან.

 
ჩვენ მოვითხოვეთ, რომ ფართი დაეცალათ. მათ პარალიზება მოახდინეს შენობის და აღარ შეიძლებოდა. დავავალეთ ზედამხედველობის სამსახურს, რომ დაეცალათ აღნიშნული ფართი”, – აცხადებს გივი გერგაძე.


გურჯაანის გამგებლის თქმით, მისთვის ყველანაირი ბრალდებები ნეპოტიზმისა და კორუფციის შესახებ გაუგებარია და აცხადებს, რომ თუ ღვინიაშვილი არ დაამტკიცებს მისი კორუფციაში მონაწილეობის რაიმე ფაქტებს, მაშინ გერგაძე ღვინიაშვილს ბოდიშის მოხდას სთხოვს.

 
“ბოდიშის მოხდას მოვითხოვ თუ მაგის ვაჟკაცობა ეყოფა. არანაირი კორუფცია არ არის, მსგავსი რამ რომ ხდებოდეს რასაც ამბობენ, ფაქტები რომ ქონდეს აქამდე დააწყობდნენ. ნეპოტიზმს რაც შეეხება, რაზე საუბრობენ ვერ ვხვდები. პატარა რაიონში სულ ყველა ერთმანეთის ნაცნობია, მაგრამ არავის და და ძმა აქ არ არის”, – აცხადებს გივი გერგაძე.

 
გურჯაანის გამგეობაში გუშინ დილიდან ხმაური იყო. “ნაციონალური მოძრაობის” წევრების თქმით, გურჯაანის გამგეობაში ადგილი აქვს კორუფციასა და ნეპოტიზმს, რის გამოც მათ ანტიკორუფციული საბჭოს ფარგლებში გურჯაანში მუშაობა დაიწყეს. გუშინვე, გურჯაანის მაჟორიტარი დეპუტატის ბიუროს  “ერთიანი ნაციონალური მოძრაობის” წევრებს დაკავებული ფართი დაატოვებინეს.



tvfree.ge