ევროპული კომისიის განცხადებით, ევროკავშირის 15-მა წევრმა ქვეყანამ, ისევე როგორც ჰონგ კონგმა და შვეიცარიამ ქიმიური ნივთიერება ფიპრონილით დაბინძურებული კვერცხი მიიღო.

ევროკომისია მინისტრებსა და რეგულატორებთან შეხვედრას 26 სექტემბერს გამართავს.

ევროკომისიის საკვების უსაფრთხოების სამსახურის ხელმძღვანელმა მოუწოდა ქვეყნებს შეწყვიტონ ერთმანეთის „დაბრალება და შერცხვენა“.

როგორც BBC იუწყება, სკანდალმა იმის თაობაზე იფეთქა, თუ რამდენი ხანი იცოდნენ ბელგიის და ჰოლანდიის ხელისუფლებებმა დაბინძურების შესახებ.

კვერცხებში, რომელიც ძირითადად ნიდერლანდებიდან გადიოდა, აღმოაჩინეს ფიპრონილი, ქიმიური ნივთიერება, რომელიც ტილების და ცხოველების ტკიპების მოსაკლავად გამოიყენება და ის ევროკავშირის მიერ კვების ინდუსტრიაში აკრძალულია.

ფიქრობენ, რომ ქათმების ზოგიერთ ფერმაში მას ამატებდნენ, როგორც სადიზენფექციო საშუალებას.

თუკი ადამიანებმა დიდი რაოდენობით მიიღეს აღნიშნული ნივთიერება, მას შეუძლია დააზიანოს თირკმელები, ღვიძლი და ფარისებრი ჯირკვლები. მიუხედავად ამისა, საკვების სტანდარტების სააგენტოები რისკების საფრთხეს ნაკლებად სერიოზულად მიიჩნევენ მათთვის, ვინც უკვე ჭამა გაფუჭებული კვერცხები.

ფერმები დაიხურა ნიდერლანდებში, ბელგიაში, გერმანიაში და საფრანგეთში მას შემდეგ რაც ხელისუფლებებმა დაადასტურეს, რომ კვერცხებში ფიპრონილი იყო გამოყენებული, განაცხადა პარასკევს ევროკომისიის წარმომადგენელმა დანიელ როზარიომ.

ევროკავშირის წევრი ქვეყნები, რომელთაც მიიღეს გაფუჭებული კვერცხები არიან: დიდი ბრიტანეთი, ავსტრია, ირლანდია, იტალია, ლუქსემბურგი, პოლონეთი, რუმინეთი, სლოვენია, სლოვაკეთი და დანია, ხოლო ევროკავშირის მიღმა შვეიცარიამ და ჰონგ კონგმა, იუწყება BBC.

დიდმა ბრიტანეთმა ნიდერლანდების პოტენციურად დაბინძურებული ფერმებიდან 700,000 მოწამლული კვერცხი მიიღო.

საფრანგეთის სოფლის მეურნეობის მინისტრმა განაცხადა, რომ აპრილის შემდეგ ქვეყანაში 250,000 დაბინძურებული კვერცხი გაიყიდა და მიღებულია ზომები, რომ პროდუქცია ამიერიდან გაყიდვიდან იყოს ამოღებული.