გერმანიის კანცლერმა, ანგელა მერკელმა რუსეთის პრეზიდენტთან, ვლადიმერ პუტინთან სატელეფონო საუბრის დროს მხარი დაუჭირა მოსკოვის ინიციატივას უკრაინის ტერიტორიაზე, დონბასში მშვიდობისმყოფელების ინიციატივასთან დაკავშირებით, თუმცა აღნიშნა, რომ აუცილებელია პროექტში ცვლილებები შევიდეს.

როგორც „რია ნოვოსტი“ იტყობინება, ამის შესახებ გერმანიის ფედერაციული რესპუბლიკის მთავრობის ოფიციალურმა წარმომადგენელმა, შტეფან ზაიბერტმა განაცხადა.

„მხარეებმა განიხილეს რუსეთის წინადადება დონბასში გაერო-ს მისიასთან დაკავშირებით. ფედერალური კანცლერი პრინციპში მიესალმა რუსულ ინიციატივას, მაგრამ მიანიშნა იმაზე, რომ მანდატში ცვლილებები უნდა შევიდეს“, განაცხადა ზაიბერტმა.

თავის მხრივ, კრემლის პრესსამსახურში განაცხადეს, რომ მოსკოვი მზადაა გაერო-ს რეზოლუციის პროექტში, რომელიც დონბასში ორგანიზაციის მისიის ფუნქციებს შეეხება, ცვლიბებები შეიტანოს. კრემლის ცნობით, ორი ქვეყნის ლიდერებმა ასევე განიხილეს მინსკის შეთანხმების რეალიზაციის გზები და ხაზი გაუსვეს, რომ მიუღებელია ცეცხლის შეწყვეტის ნებისმიერი დარღვევა.

იმ პროექტის თანახმად, რომელიც რუსულმა მხარემ გასული კვირის სამშაბათს გაერო-ს უშიშროების საბჭოს გადასცა, მისიის ჩამოყალიბება უკრაინაში ეუთოს დამკვირვებლების დაცვის მიზნითა განსაზღვრული.

უფრო ადრე ვლადიმერ პუტინმა მხარი დაუჭირა უკრაინაში მშვიდობისმყოფელების გაგზავნის იდეას, აღნიშნა რა, რომ საუბარი მხოლოდ ეუთოს თანამშრომლების უსაფრთხოების უზრუნველყოფაზე იქნებოდა შესაძლებელი. მან ასევე დაამატა, რომ „ცისფერჩაფხუტიანები“ მხოლოდ გამყოფ ხაზზე უნდა იყვნენ განლაგებულნი.