ჩრდილოეთ კორეის ლიდერმა, „კორეის მუშათა პარტიის“ თავმჯდომარემ, კიმ ჩენ ინმა ფხენიანში შაბათს, 7 ოქტომბერს „კორეის მუშათა პარტიის“ ცენტრალური კომიტეტის მეორე პლენუმზე სიტყვით გამოსვლისას განაცხადა, რომ შეერთებული შტატების „იმპერიალისტები ძალისხმევას არ იშურებენ სრულიად ჩაახრჩონ კორეის სახალხო-დემოკრატიული რესპუბლიკის სუვერენიტეტი“, თუმცა ამის მიუხედავად, აღნიშნა მან, ქვეყნის ეკონომიკა იზრდება, მეცნიერება და ტექნოლოგიები კი ძალიან სწრაფი ტემპით ვითარდება.

როგორც ჩრდილო კორეის ცენტრალური სახელმწიფო სააგენტო იტყობინება, ქვეყნის ლიდერმა თავის გამოსვლაში გაანალიზა გართულებული საერთაშორისო მდგომარეობა, რომელიც ჩრდილოეთ კორეის გარშემოა შექმნილი. კიმ ჩენ ინმა თქვა, რომ გაერო-ს უშიშროების საბჭოს ერთიმეორეზე მიყოლებული „რეზოლუციებით და სანქციებით“ და „თავიანთი ვასალური ძალების მობილიზებით შეერთებული შტატების იმპერიალისტები ძალისხმევას არ იშურებენ სრულიად ჩაახრჩონ კორეის სახალხო-დემოკრატიული რესპუბლიკის სუვერენიტეტი, არსებობის უფლება და განვითარება“.

კიმ ჩენ ინმა მთელი სერიოზულობით განაცხადა: კორეის სახალხო-დემოკრატიული რესპუბლიკის ბირთვული იარაღი ძვირფასი ხორცშესხმაა იმ იდეალებისა, რომელიც თავისი ხალხის ბედ-იღბლისა და სუვერენიტეტის შეერთებული შტატების იმპერიალისტების ხანგრძლივი ბირთვული საფრთხეებისაგან დაცვისათვის სისხლიან ბრძოლაში იშვა. და ეს იარაღები მძლავრი და მტკიცე შემაკავებელი და უზრუნველმყოფელია მშვიდობისა და უსაფრთხოებისა კორეის ნახევარკუნძულზე და ჩრდილო-აღმოსავლეთ აზიაში და საიმედო გარანტორია კორეული სახელმწიფოს სუვერენიტეტის და არსებობის უფლების და განვითარების და არის სამართლიანობის დამცავი მახვილი - გაფანტოს ტირანიის ბირთვული ღრუბლები, რემლთაც საშინელი უბედურება მოაქვთ კაცობრიობისათვის, და შესაძლებელი გახადოს ადამიანებისთვის, განავითარონ დამოუკიდებელი და ბედნიერი ცხოვრება, ნათელი და უღრუბლო, ლურჯი ცის ქვეშ.

მან აღნიშნა, რომ ქვეყნის მეცნიერება და ტექნოლოგიები განსაცვიფრებელი ტემპებით განვითარდა და ეროვნული ეკონომიკა მიმდინარე წელს მძლავრად გაიზარდა, მიუხედავად შეერთებული შტატების იმპერიალისტების და მათი ვასალური ძალების მიერ დაწესებული სანქციებისა, წერს ცენტრალური სააგენტო.

მას შემდეგ, რაც ათწლეულების განმავლობაში ფხენიანთან მოლაპარაკებებს შედეგი არ მოუტანია, „მხოლოდ ერთი რამ იმუშავებს“ ჩრდილოეთ კორეასთან საკითხის გადასაწყვეტად, განაცხადა ამერიკის შეერთებული შტატების პრეზიდენტმა, დონალდ ტრამპმა.

„პრეზიდენტები და მათი ადმინისტრაციები 25 წლის განმავლობაში საუბრობდნენ ჩრდილოეთ კორეასთან“, დაწერა მან „თვითერზე“ და დაამატა, რომ ამან „არ იმუშავა“.

ტრამპს ამჯერად დამატებით არ განუვრცია თემა, თუმცა უფრო ადრე, გააფრთხილა ფხენიანი, რომ ამერიკის ეროვნული ინტერესების და რეგიონში მისი მოკავშირეების თავდაცვის მიზნით, შეერთებულმა შტატებმა შესაძლოა, გაანადგუროს ჩრდილოეთ კორეა, რომლის ბირთვული და სარაკეტო პროგრამები ტრამპის ადმინისტრაციის განსაკუთრებული აღშფოთების საგანია.