საქართველოს პრემიერ მინისტრმა, გიორგი კვირიკაშვილმა მცხეთა-მთიანეთის რეგიონის მუნიციპალიტეტების მერობის კანდიდატების წარდგენისას განაცხადა, რომ აღნიშნულ რეგიონში მთავრობას ერთ-ერთი ყველაზე ამბიციური გეგმა აქვს სამომავლოდ. „დაწყებულია უკვე არაერთი მნიშვნელოვანი პროექტი, მაგრამ კიდევ უფრო მასშტაბური პროექტები წინ არის“, თქვა პრემიერმა, რომელმაც საზოგადოებას მოუწოდა მხარი დაუჭირონ იმ ადამიანებს, რომლებიც ადგილობრივი თვითმმართველობის დონეზე იზრუნებენ ადამიანების პრობლემების მოგვარებაზე.

„ჩვენ ნამდვილად გვაქვს სათქმელი, რომ ჩვენმა ხელისუფლებამ, ყველა თქვენგანთან ერთად, გაიარა მნიშვნელოვანი პერიოდი. ამ პერიოდის განმავლობაში ნაბიჯები გადაიდგა, კერძოდ, მცხეთა-მთიანეთშიც არაერთი ძალიან მნიშვნელოვანი პროექტი განხორციელდა, რომლებმაც ადამიანებს ცხოვრება შეუმსუბუქა“, განაცხადა კვირიკაშვილმა.

მისი თქმით, საყოველთაო ჯანდაცვის პროგრამა იყო უმნიშვნელოვანესი ნაბიჯი იმისათვის, რომ „ათი ათასობით ადამიანის სიცოცხლე გადაგვერჩინა ჩვენს ქვეყანაში“.

„ჩვენ პრიორიტეტად გამოვაცხადეთ მთის გადარჩენა, მთაში ჩვენი მოსახლეობის დაბრუნება, გამაგრება, ეს არის ძალიან მნიშვნელოვანი ნაბიჯი და ამ მიმართულებით კიდევ არაერთი პროექტის განხორციელებას ვგეგმავთ. ასევე, პრიორიტეტად გამოვაცხადეთ სოფლის მეურნეობის და ადგილობრივი მეწარმეობის აღორძინება, რაზეც დიდი რესურსიც დაიხარჯა. შედეგები უკვე არის სახეზე და კიდევ უფრო მეტ შედეგს ველოდებით, რასაც თითოეული ჩვენგანი აუცილებლად ვიგრძნობთ.

გასულ პერიოდში, მიკრო და მცირე მეწარმეობის მხარდასაჭერად, ჩვენ 200-ზე მეტი პროექტი განვახორციელეთ ამ რეგიონში. ინდუსტრიული წარმოების ხელშეწყობისთვის, 26 მილიონ ლარზე მეტია დახარჯული და ძალიან ბევრი მცირე მეწარმე გახდა ამ პროექტების მონაწილე.

ასევე უნდა აღინიშნოს, რომ ყოველწლიურად 40 ათასზე მეტმა გლეხმა და ფერმერმა ისარგებლა 14 მილიონ ლარზე მეტი რესურსით და ეს რესურსი თითოეული ადამიანთან მივიდა, ვინც კი ხვნა-თესვის პროგრამაში მონაწილეობდა.

პროგრამა „დანერგე მომავლის“ ფარგლებში, რეგიონში 64 ჰექტარზე გაშენდა ხეხილის ბაღები, რისთვისაც 800 ათას ლარამდე დაფინანსება განახორციელა სახელმწიფომ. ეს პროექტები უკვე შედეგებს აჩვენებს, მაგრამ „დანერგე მომავალი“ არის პროგრამა, რომელიც რამდენიმე წელში გამოიღებს ნაყოფს და ეს შემოსავალი ნამდვილად აისახება ამ პროგრამაში მონაწილე ადამიანების ცხოვრების დონეზე.

სახელმწიფოს ხელშეწყობით, მცხეთა-მთიანეთში 8 ახალი მსხვილი საწარმო გაიხსნა, ხოლო გაფართოვდა 10 არსებული საწარმო. ჩვენ ვახორციელებთ მასშტაბურ ინფრასტრუქტურულ პროექტებს. ეს პროექტები უაღრესად მნიშვნელოვანია ამ რეგიონში ცხოვრების პირობების გაუმჯობესებისთვის, უდიდესი ტურისტული პოტენციალის სრულფასოვნად ათვისებისთვის. ჩვენი ქვეყნის ეკონომიკის წინსვლისთვის აუცილებელია ის პროექტები, რომლებიც ჩვენ გამოვაცხადეთ პრიორიტეტად და ეს არის, კონკრეტულად, მცხეთიდან ლარსისკენ მიმავალი თანამედროვე ავტობანის პროექტირება და აშენება, რათა სატრანზიტო ფუნქცია ამ რეგიონმა სრულფასოვნად განახორციელოს. 2018 წელს დასრულდება პროექტირება და 2019 წლის დასაწყისში დაიწყება მშენებლობა“, განაცხადა გიორგი კვირიკაშვილმა და განაგრძო:

„წელს ჩვენ დავიწყეთ გვირაბის მშენებლობა დარიალის ხეობაში. როგორც იცით, ყოველწლიურად დევდორაკიდან ჩამოდის ღვარცოფის დიდი მასა, რომელიც დიდი პრობლემაა სატრანზიტო გზისათვის. პროექტი, რომელსაც ჩვენ ვახორციელებთ, ამ პრობლემას მთლიანად მოხსნის და ლარსის გამშვებ პუნქტს დავუკავშირდებით უსაფრთხო გზით.

ჩვენ ასევე ვახორციელებთ ინფრასტრუქტურულ პროექტს, რომელიც მართლაც უპრეცედენტოა - ეს გახლავთ პირიქითა ხევსურეთთან დამაკავშირებელი გზის მშენებლობა - როშკა-არხოტის 28 კმ-იანი გზა, რომელიც აქამდე არ არსებობდა და იქ გადაადგილება მხოლოდ ფეხით, ცხენითა და ვერტმფრენით იყო შესაძლებელი. ამ პროექტის დასრულებას მომავალ წელს ვგეგმავთ. ასე რომ, მალე პირიქითა და პირაქეთა ხევსურეთს, სრულიად ახალი გზა დააკავშირებს ერთმანეთთან. ეს იქნება უდიდესი შეღავათი მოსახლეობისთვის და ამავე დროს, მთელი ამ გზის გაყოლებაზე, ეს პროექტი გაზრდის ტურისტულ მიმზიდველობასაც, რაც თავისთავად არის დამატებითი შემოსავალი თითოეული აქ მცხოვრების ოჯახში.

ჩვენ დავიწყეთ გერგეტის სამების ეკლესიასთან მისასვლელი გზის მშენებლობა, რომლის დასრულება მომავალი წლისთვის იგეგმება. ეს პროექტი 7 მილიონ 800 ათას ლარამდე ჯდება. ეს იქნება, როგორც ჩვენი ხალხისთვის, ისე ტურისტებისთვის გერგეტამდე მისასვლელი უსაფრთხო და კომფორტული გზა, რომელიც დიდ როლს შეასრულებს ყაზბეგის ტურისტული პოტენციალის მაქსიმალურად ათვისებაში.

ასევე, დაგეგმილი გვაქვს გზის მშენებლობა ძალიან საინტერესო და მნიშვნელოვანი მარშრუტის მიმართულებით. ეს გახლავთ სნო - ჯუთა-როშკა- შატილი-ომალო- ხადორის ხეობა- ბაწარა -ახმეტის გზა. მისი სავარაუდო ღირებულება 200 მილიონ ლარამდეა. ეს იქნება სტრატეგიული მნიშვნელობის გზა ჩვენი ქვეყნისთვის. გარდა ამისა, ეს გზა გამოიწვევს მნიშვნელოვან ეკონომიკურ წინსვლას მთელი ამ გზის მარშრუტის გასწვრივ. ასევე დასრულდა თიანეთისა და ჟინვალის შემაერთებელი გზის მშენებლობა, რომელიც ძალიან მნიშვნელოვანია ამ რეგიონის მცხოვრებლებისთვის და კიდევ არაერთი ინფრასტრუქტურული პროექტი განხორციელების ფაზაშია. ეს პროცესი, რა თქმა უნდა, აქტიურად გაგრძელდება. ეს პროექტები ეხება არა მარტო გზებს, არამედ წყალმომარაგებას, კულტურის ობიექტებს, საბავშვო ბაღებს, სპორტულ ინფრასტრუქტურას. ამ პროექტების განხორციელება საბოლოოდ აისახება ადამიანების, ჩვენი ხალხის ყოველდღიურ ყოფაზე, მათ შემოსავლებსა და კეთილდღეობაზე.

აქვე მინდა ვთქვა, რომ მცხეთაში 120 დევნილი ოჯახის განსახლების მიზნით, თანამედროვე სტანდარტების კორპუსების მშენებლობა დაიწყო. ეს პროექტი, მომავალი წლის სექტემბრამდე დასრულდება და ამით მცხეთაში, დევნილთა განსახლების პრობლემა მნიშვნელოვნად გადაიჭრება.

ეს არის ძალიან მნიშვნელოვანი პროექტი, რომელიც ჩვენს დევნილებს მისცემს ღირსეულ პირობებში ცხოვრების შესაძლებლობას.

აქვე მინდა, მივესალმო ყველა იძულებით გადაადგილებულ პირს, რომლებიც დღეს ჩვენთან ერთად იმყოფებიან სხვადასხვა დასახლებებიდან. რა თქმა უნდა, ჩვენთვის ეს არის უდიდესი ტკივილი, მაგრამ დამერწმუნეთ, ჩვენ ძალიან ბევრ ნაბიჯს ვდგამთ, რომელიც ჯერ კიდევ შეიძლება არ იყოს ყველასთვის საჯარო, იმისათვის რომ ეს პრობლემა საბოლოოდ გადაწყდეს. ჩვენ ჩვენი ქვეყანა უნდა გავაერთიანოთ, უნდა გავაერთიანოთ სიყვარულით, ეკონომიკური განვითარებით და ასევე, ეფექტური საგარეო პოლიტიკით ჩვენი მეგობრების დახმარებით; მაგრამ პირველ რიგში, ჩვენ უნდა დავიბრუნოთ ჩვენი აფხაზი და ოსი თანამოქალაქეები, მათი გულები, ჩვენ უნდა გავაერთიანოთ ჩვენი ქვეყანა და მე ერთი წამით, იოტისოდენა ეჭვიც კი არ მეპარება, რომ ჩვენ ამას აუცილებლად განვახორციელებთ და განვახორციელებთ ყველა თქვენგანთან ერთად, რა თქმა უნდა, ღმერთის შეწევნით.

მინდა აღვნიშნო ისიც, რომ ყველა პროექტი, რომელსაც ჩვენ ვახორციელებთ და ეს, რა თქმა უნდა, ყველაფერი არ არის, ტურისტული მიმართულებების ძალიან მნიშვნელოვანი განვითარებაა. გუდაური აუცილებლად გადაიქცევა არა მარტო საქართველოს, არამედ მთელს სამხრეთ კავკასიაში ერთ-ერთ ყველაზე მნიშვნელოვან, მიმზიდველ კურორტად. ჩვენ ამ მიმართულებით ბევრი ნაბიჯი უკვე გადავდგით, მაგრამ მომავალში კიდევ უფრო მნიშვნელოვან პროექტს ვგეგმავთ და ეს არის კობისა და გუდაურის დამაკავშირებელი საბაგირო გზა, რომელიც ყაზბეგს და სტეფანწმინდას გუდაურთან დააკავშირებს და ამ მიმართულებას ერთიან, დიდ ტურისტულ კომპლექსად გადააქცევს. ყაზბეგი აღარ იქნება მხოლოდ ზაფხულის კურორტი და მთლიანად ყაზბეგი-გუდაური იქნება ერთი, მთლიანი, ძალიან მნიშვნელოვანი ტურისტული მიმართულება რეგიონული მასშტაბით.

ასევე მინდა გითხრათ, რომ თავის ძველ დიდებას აუცილებლად დაიბრუნებს ფასანაური. ჩვენ დავასრულეთ მოლაპარაკებები ფასანაურის ძველი ტურისტული კომპლექსების მშენებლობაზე, ეს არის უპირველეს ყოვლისა ე.წ. ინტურისტის კომპლექსი, ულამაზესი ადგილი, რომელიც ყველას გვახსოვს, ვინც ჩემი ასაკის არის და უფრო ხნიერი, თუ რამხელა მნიშვნელობა ჰქონდა ფასანაურს და მის ტურისტულ პოტენციალს მთლიანად რეგიონისთვის. მე დარწმუნებული ვარ, რომ ჩვენი ჩართულობით ეს აუცილებლად განხორციელდება და ფასანაური ისევ გადაიქცევა ერთ-ერთ ყველაზე პოპულარულ მიმართულებად. და რა თქმა უნდა ეს არის თიანეთი, რომლის პოტენციალიც დღესდღეობით ძალიან მცირედით არის ათვისებული და დარწმუნებული ვარ, რომ საქართველოსთვის ერთ-ერთი მართლაც ყველაზე ულამაზესი რაიონი აღორძინდება და იქ აუცილებლად განვითარდება ყველა ის მნიშვნელოვანი ინფრასტრუქტურა, რომელიც თიანეთს ერთ-ერთ ყველაზე მიმზიდველ ადგილად გადააქცევს საქართველოში. ჩვენ ყველანი ერთად ამას ხელს შევუწყობთ. ჩვენ თქვენი დახმარების გარეშე ამ მნიშვნელოვან საქმეებს ვერ გავაგრძელებთ და ვერ დავასრულებთ.

როდესაც მე ამ წარმატებებზე და ამ უმნიშვნელოვანეს გეგმებზე ვსაუბრობ, ერთი წუთით არ მტოვებს ძალიან მძაფრი შეგრძნება იმ გაჭირვებისა, რომელიც დღეს კიდევ არსებობს ჩვენს ქვეყანაში. დარწმუნებული ვარ, რომ აქ მდგომი ადამიანებიდან ძალიან ბევრს არ აქვს დალხინებული ცხოვრება, მაგრამ დამერწმუნეთ, არ არსებობს ალტერნატივა იმისა, რასაც ჩვენ ვაკეთებთ. ეს შეიძლება ძალიან ხმამაღალი ნათქვამი იყოს, მაგრამ ეს არის გააზრებული გზა, რომელსაც ჩვენ, „ქართული ოცნება - დემოკრატიული საქართველო“ ჩვენი ხალხის მხარდაჭერით ვადგავართ. ეს არის სტაბილურობის გზა, რომელიც ემყარება თითოეული ადამიანის ღირსებას, პატივისცემას და სიყვარულს. როგორ შეიძლება ჩვენ არ დავინახოთ და არ დავაფასოთ ეს ყველაფერი. კიდევ ერთხელ ვამბობ, ჩვენ ჯერ კიდევ არ ვართ ახლოს იმ წარმატებასთან, რომელსაც თქვენთან ერთად ვაშენებთ, მაგრამ ნაბიჯები, რომლებსაც ჩვენ ვდგამთ, უკვე გადავდგით და მომავალში დაგეგმილი გვაქვს, აშენებს იმ საფუძველს, რომელსაც დაემყარება ძლიერი, ერთიანი, სიყვარულზე დაფუძნებული ქვეყანა, რომელსაც ჩვენი სამშობლო, ჩვენი საქართველო ჰქვია. მე ამის თქვენთან ერთად მჯერა, მჯერა თითოეული წვეთით იმ სისხლისა, რომელიც ჩემს ძარღვებშია, ჩემო მეგობრებო. დარწმუნებული ვარ, ყველა თქვენგანს სწორედ ასეთი სიყვარული აქვს ძარღვებში, სწორედ ასე უცემს გული, რომ ჩვენ ერთად ავაშენოთ ის ღირსეული ქვეყანა, რომლის ღირსებიც ჩვენი წინაპრები არიან, რომლის ღირსებიც ჩვენ ვართ და ჩვენი მომავალი თაობაა. კიდევ ერთხელ, უპირველეს ყოვლისა, ქედს ვიხრი ყველა ადამიანის წინაშე, რომელიც უძლებს დღევანდელ დღეს და რომელიც ნაბიჯ-ნაბიჯ, ჩვენთან ერთად აშენებს კიდევ უფრო გაბრწყინებულ საქართველოს“, აღნიშნა პრემიერ მინისტრმა, რომელმაც მოსახლეობას მერობის კანდიდატები წარუდგინა.

„მინდა, წარმოგიდგინოთ ის ადამიანები, რომლებიც ყოველდღიურად, 24 საათის განმავლობაში იმუშავებენ იმისათვის, რომ ამ რეგიონში თითოეული მცხოვრების პრობლემა მოაგვარონ, თუ ვერ მოაგვარებენ - შეამსუბუქონ, თუ ვერ შეამსუბუქებენ - სიმართლე გითხრან, მაგრამ არასოდეს არ მოგატყუონ, არასოდეს არ იყვნენ გულგრილები არც ერთი თქვენგანის პრობლემის წინაშე და მე დარწმუნებული ვარ, რომ ისინი სწორედ ასეთი ადამიანები არიან.

მინდა წარმოგიდგინოთ, მცხეთის მერობის კანდიდატი - გიორგი კაპანაძე; დუშეთის მერობის კანდიდატი - ზურაბ სეხნიაშვილი; თიანეთის მერობის კანდიდატი - ლელა ქიტესაშვილი; ყაზბეგის მერობის კანდიდატი - ალექსანდრე ზაგაშვილი;

ესენი არიან პროფესიონალი, გამოცდილი ადამიანები, რომლებიც მუხლჩაუხრელად იზრუნებენ იმისათვის, რომ სამი წლის თავზე არ რცხვენოდეთ არც ერთი თქვენგანისთვის თვალის გასწორება.

და მე მჯერა, მეგობრებო, რომ ჩვენ ყველანი ერთად გადავდგამთ იმ სწორ ნაბიჯებს, რომლებიც ჩვენს ქვეყანას ერთხელ და სამუდამოდ გამოიყვანს იმ ჩაკეტილი საბედისწერო წრიდან, რომელზეც ჩვენ დამოუკიდებლობის მოპოვების დღიდან დავდივართ. დარწმუნებული ვარ, ჩვენ ამის ძალა შეგვწევს, მიუხედავად იმისა, უნდა ეს ვიღაცას, თუ არ უნდა და დაინახეთ თქვენ დღეს, რაც ხდებოდა საკრებულოს წინ. მაგრამ, მეგობრებო, იცოდეთ, ჩვენ შეგვწევს ძალა, რომ შევინარჩუნოთ სტაბილურობა, კიდევ უფრო გავამყაროთ ის და თქვენთან ერთად დავიცვათ ის მონაპოვარი, რომელიც 2012 წელს ჩვენ ერთად მოვიპოვეთ ბიძინა ივანიშვილის ხელმძღვანელობით. და ეს აუცილებლად არასოდეს არავინ არ უნდა დაივიწყოს. სამწუხაროდ, დღეს ჩვენ რასაც ვხედავთ - ამ ადამიანების უკიდურეს უმადურობას, ამას ჩვენ ყველანი ერთად გადავლახავთ და არა მხოლოდ გადავლახავთ, ჩვენ ყველანი ერთად ავაშენებთ უკეთეს მომავალს ჩვენი ქვეყნისთვის“, განაცხადა კვირიკაშვილმა.