მამა გიორგი არის ისევ იმ თავის აზრზე, რომ ეს იყო შეთქმულება ჩემს წინააღმდეგ - ჩვენ ამაზე საკმაოდ დიდიხანს ვისაუბრეთ, აღნიშნული განცხადება ბათუმისა და ლაზეთის მიტროპოლიტმა, მეუფე დიმიტრი ე.წ. მატროსოვის ციხეში დეკანოზ გიორგი მამალაძის მონახულების შემდეგ გააკეთა.

„მე ვთვლი, რომ ეს იყო შეთქმულება არა მარტო ჩემს წინააღმდეგ, არამედ ეკლესიის წინააღმდეგ. და ვინც ეს ყველაფერი შეთხზა, ის არის ძალიან ბოროტი ადამიანი იმიტომ, რომ ამას ვერ მოიფიქრებდა ვერავინ - ჩემს საკუთარ გამზრდელთან, ბიძასთან, პატრიარქთან და ა.შ. ამ ამბოხში თუ წინააღმდეგობაში ჩართულობა.... ის ისევ რჩება თავის აზრზე, რომ ეს მას მოუწყვეს და ეს მოუწყო ადამიანების იმ ჯგუფმა, ვისაც ის ყოველთვის ასახლებდა და აცხადებს, რომ ეს შორენა თეთრუაშვილისგან ჰქონდა ეს შეკვეთა მას“, განაცხადა მეუფე დიმიტრიმ, რომლის თქმითაც, მამა გიორგი მამალაძემ შეხვედრაზე მას ბოდიშიც მოუხადა, რომ გარკვეულ საკითხებთან დაკავშირებით საქმის კურსში არ ჩააყენა.

„მან ბოდიშიც მოიხადა, რომ ბევრ საკითხებს შენთან არ ვათანხმებდი. მე ვკითხე მას, რომ თუ შორენამ შეგიკვეთა და თუ მე ვთვლი შენს მოძღვრად, რატომ არ მოხვედი და არ ჩამაყენე საქმის კურსში? რაზეც თქვა, რომ ეს იყო ჩემი შეცდომაო“, განაცხადა მეუფე დიმიტრიმ მედიის წარმომადგენლებთან საუბრისას.

ბათუმისა და ლაზეთის მიტროპოლიტის თქმით, ე.წ. ციანიდის საქმესთან დაკავშირებით გამოძიებამ ბევრი პასუხგაუცემელი კითხვა დატოვა.

„უშუალოდ ციანიდთან დაკავშირებით, ჰქონდა თუ არ ჰქონდა მას ციანიდი და მე მაშინ აღვნიშნე, რომ ეს ვერ დაადასტურა, რომ მან ნამდვილად შეიძინა ციანიდი. მე ეს თავის დროზე პროკურორებსაც მოვახსენე, რომ საზოგადოებაში არსებობს ძალიან ბევრი კითხვა და ამ კითხვებს პასუხი უნდა გაეცეს. ყველაზე მეტად, თუ ვინმეს უნდა, რომ მამა გიორგი გამართლდეს და უდანაშაულო დარჩეს, ერთ-ერთი მე ვარ“, აღნიშნა მეუფე დიმიტრიმ.