ამერიკის შეერთებული შტატების პრეზიდენტმა, დონალდ ტრამპმა ჰილარი კლინტონის და ოპოზიციური „დემოკრატიული პარტიის“ „ბრალეულობის“ შესახებ „თვითერზე“ ტირადა წამოიწყო და მისი მგზნებარე განცხადებების გაკეთება მას შემდეგ მოხდა, რაც გავრცელდა ინფორმაცია იმის თაობაზე, რომ რუსეთის მიერ აშშ-ის არჩევნებში შესაძლო ჩარევასთან დაკავშირებით მიმდინარე გამოძიების ფარგლებში პირველი დაპატიმრება მიმდინარე კვირას, შესაძლოა, ორშაბათსაც კი მოხდეს.

ტრამპი დაჟინებით ამტკიცებს, რომ მის საარჩევნო კამპანიასა და რუსეთს შორის საიდუმლო შეთანხმების შესახებ ბრალდებები „ნაყალბევია“ და ეს „კუდიანებზე ნადირობას“ წარმოადგენს. მოსკოვმაც არაერთხელ უარყო მსგავსი ბრალდებები.

ტრამპმა განაცხადა, რომ „რესპუბლიკელები“ მის გარშემო არიან გაერთიანებული.

როგორც ამერიკის შეერთებული შტატების მედია, CNN-ი და Reuters-ი ანონიმურ წყაროებზე დაყრდნობით იტყობინება, რუსეთის აშშ-ის არჩევნებში შესაძლო ჩარევის შესახებ მიმდინარე გამოძიებამ, რომელსაც სპეციალური პროკურორი რობერტ მიულერი ხელმძღვანელობს, უკვე გამოკვეთა სამიზნე, თუმცა დამატებითი დეტალები უცნობია და ამ დრომდე არ სახელდება, თუ ვის დააპატიმრებენ უახლოეს პერიოდში.

ტრამპმა „თვითერზე“ ოთხი განცხადება გააკეთა, სადაც ხაზგასმით თქვა, რომ „საიდუმლო შეთანხმება არ არსებობს“. „დემოკრატები“ იყენებენ ამ საშინელ (და ჩვენი ქვეყნისთვის საზიანო) კუდიანებზე ნადირობას ბოროტი პოლიტიკისთვის, მაგრამ „რესპუბლიკელები“, როგორც არასდროს, ისე დგანან ამის საწინააღმდეგოდ. რაოდენი ბრალეულობაა დემოკრატების/კლინტონის მიერ და ახლა ფაქტები იღვრება. გააკეთეთ რაიმე!“ დაწერა ტრამპმა სოციალურ ქსელში და მოგვიანებით დაამატა: „ყოველივე ეს, ‘რუსეთზე’ საუბარი ხდება ზუსტად მაშინ, როცა „რესპუბლიკელები“ გადასახადების შემცირების და რეფორმის მიმართულებით ისტორიულ ნაბიჯებს დგამენ. და ეს დამთხვევაა? არა!“

შეერთებული შტატების სადაზვერვო სამსახურებმა უკვე კარგა ხანია რაც დაასკვნეს, რომ რუსეთის მხრიდან ადგილი ჰქონდა ამერიკის 2016 წლის საპრეზიდენტო არჩევნებში ჩარევას, თუმცა მიულერის გამოძიება არკვევს, არსებობდა თუ არა რაიმე კავშირები რუსეთსა და ტრამპის საარჩევნო კამპანიის წარმომადგენლებს შორის.

მიულერი, აშშ-ის ფედერალური საგამოძიებო ბიუროს (FBI) ყოფილი დირექტორი იუსტიციის დეპარტამენტმა სპეციალურ პროკურორად მაისში დანიშნა, მალევე რაც FBI-ის დირექტორობიდან პრეზიდენტმა ტრამპმა ჯეიმს კომი გაათავისუფლა.

ტრამპმა პარასკევს განაცხადა, რომ ახლა „საყოველთაო თანხმობაა“ იმის თაობაზე, რომ მასსა და რუსეთს შორის საიდუმლო შეთანხმება არ ყოფილა, მაგრამ პრეზიდენტის თქმით, არსებობდა კავშირები მოსკოვსა და ჰილარი კლინტონს შორის.

„რესპუბლიკელმა“ კანონმდებლებმა განაცხადეს, რომ 2010 წელს, როცა სახელმწიფო მდივანი ჰილარი კლინტონი იყო, რუსულ კომპანიასთან ურანიუმის შეთანხმება მისი ქმრის, აშშ-ის ყოფილი პრეზიდენტის, ბილ კლინტონის საქველმოქმედო ორგანიზაციისთვის შემოწირულობების გაღების სანაცვლოდ დაიდო.