შეერთებული შტატების სადაზვერვო სამსახურის ხელმძღვანელები აშშ-ის პრეზიდენტის, დონალდ ტრამპის მიერ, მისი ვალდიმერ პუტინთან ბოლო საუბრების განხილვის დროს, მათდამი თავდასხმას პასუხობენ.

ეროვნული სადაზვერვო სამსახურის ყოფილმა დირექტორმა, ჯეიმს კლაპერმა CNN-თან საუბრისას კვირას განაცხადა, რომ ტრამპის მხრიდან გასული წლის საპრეზიდენტო არჩევნებზე რუსეთის ჩარევის საფრთხის ნაკლებად მნიშვნელოვნად წარმოჩენა სახიფათოა ამერიკის ეროვნული ინტერსებისათვის და საშუალებას აძლევს ისეთ ქვეყნებს, როგორიცაა რუსეთი და ჩინეთი, „ათამაშონ“ პრეზიდენტი. ცენტრალური სადაზვერვო სააგენტოს ყოფილმა დირექტორმა, ჯონ ბრენანმა კი თქვა, რომ პუტინის აშკარა წარმატება ტრამპთან მისი პირფერობის გამოყენება გახდა და ბრენანს ეჭვი აქვს, რომ „ტრამპი რაიმე მიზეზით“, შესაძლოა, „დაშინებული“ ჰყავდეს პუტინს.

ტრამპმა, აზია-წყნარი ოკეანის სამიტის ფარგლებში მის რუს კოლეგასთან ხანმოკლე შეხვედრის შემდეგ განაცხადა, რომ ვლადიმერ პუტინი, რუსეთის შეერთებული შტატების არჩევნებში ჩარევის ბრალდებების გამო, თავს შეურაცხყოფილად გრძნობს.

„მან [პუტინმა] თქვა, რომ იგი აბსოლუტურად არ ჩარეულა არჩევნებში“, განაცხადა ტრამპმა, როგორც ამას BBC იუწყება, ხოლო მოგვიანებით პუტინმა უსაბუთო მტკიცებები უარყო და თქვა, რომ ეს „პოლიტიკური ბრძოლის“ შემადგენელი ნაწილია.

ტრამპის თქმით, მას შაბათს „ორი თუ სამი“ ხანმოკლე საუბარი ჰქონდა მის რუს კოლეგასთან აზია-წყნარი ოკეანის თანამშრომლობის სამიტზე, ვიეტნამის საპორტო ქალაქ და ნანგში.

„მან [პუტინმა] თქვა, რომ არ ჩარეულა. მან თქვა, რომ არ ჩარეულა. მე ვკითხე მას ისევ“, უთხრა ტრამპმა რეპორტიორებს ბორტ ნომერ 1-ზე, როდესაც იგი ჰანოისკენ მიემართებოდა.

მან განაცხადა, რომ დარწმუნებულია, რომ პუტინი „ძალიან შეურაცხყოფილია ამით, რაც კარგი რამ არაა ჩვენი ქვეყნისთვის“.

მოგვიანებით პუტინმა უარყო ბრალდებები რუსეთის მხრიდან ტრამპის კამპანიის გუნდის მეშვეობით აშშ-ის არჩევნებში ჩარევასთან დაკავშირებით, რაზეც ამერიკაში გამოძიება მიმდინარეობს, და რეპორტიორებს განუცხადა: „ყველაფერი, ეგრეთ წოდებული რუსული დოსიეს შესახებ შეერთებულ შტატებში, მიმდინარე შიდა პოლიტიკური ბრძოლის გამოვლენაა“.

ტრამპმა კლაპერი, ბრენანი და ფედერალური საგამოძიებო ბიუროს ყოფილი დირექტორი, ჯეიმს კომი მოიხსენია, როგორც „პოლიტიკურად უსარგებლონი“.

შეერთებული შტატების სადაზვერვო სამსახურებმა იანვარში რუსეთის აშშ-ის არჩევნებში ჩარევის შესახებ გამოძიების არასაიდულმლო ნაწილი გამოაქვეყნეს, სადაც ნათქვამია, რომ პუტინმა ჰილარი კლინტონის კანდიდატურის საწინააღმდეგოდ და დონალდ ტრამპის წარმატებული საარჩევნო კამპანიის გასაძლიერებლად აშშ-ის არჩევნებში ჩარევის ბრძანება გასცა. პუტინი უარყოფს ბრალდებებს, და ტრამპმაც არაერთხელ უარყო აღნიშნული, უწოდა რა მას „კუდიანებზე ნადირობა“.

ბრენანი მიიჩნევს, რომ ტრამპის მათზე თავდასხმა არის იმის მცდელობა, რომ ძირი გამოუთხაროს სადაზვერვო საზოგადოების მოხსენების დამაჯერებლობას, რომელიც ცენტრალური სადაზვერვო სააგენტოს ყოფილი დირექტორის თქმით, სადაზვერვო და სამართალდამცავი უწყებების ოფიცრების მიერ არის დაწერილი, და არა მისი, კლაპერის ან კომის მიერ.

„მან ჩვენ მოგვიხსენია, როგორც პოლიტიკურად უსარგებლონი, რადგან ის ცდილობდა სადაზვერვო საზოგადოების შეფასების დელეგიტიმიზაციას“, განაცხადა ბრენანმა.