60-ზე მეტი ცრუ ზარი იქნა მიღებული შეტყობინებით, რომ 50 ასაფეთქებელი მოწყობილობა იყო დამონტაჟებული ვლადიმერ პუტინის კორტეჟის სანკტ-პეტერბურგისკენ მიმავალი მარშრუტის გასწვრივ, განაცხადა რუსეთის პრეზიდენტის პრეს-მდივანმა დიმიტრი პესკოვმა.

პარასკევს, ვლადიმერ პუტინი პეტერბურგში ჩავიდა და მონაწილეობა მიიღო კულტურულ ფორუმში, ასევე, შეხვედრა გამართა კულტურის სფეროს მოღვაწეებთან.

„მიღებულ იქნა დაახლოებით 60 ზარი, რომლებიც იტყობინებოდნენ 50-მდე ასაფეთქებელი მოწყობილობის შესახებ, რომელიც სხვადასხვა ობიექტზე იყო განთავსებული, მათ შორის პრეზიდენტის კორტეჟის გასწვრივ და იმ ობიექტების სიახლოვეს, სადაც სანკტ-პეტერბურგში პრეზიდენტი პუტინი უნდა მისულიყო“, განაცხადა პესკოვმა, როგორც ამას სააგენტო „რია ნოვოსტი“ იტყობინება.

უსაფრთხოების სამსახურმა ყველაფერი გააკეთა, რისი გაკეთებაც შეიძლებოდა ასეთ მდგომარეობაში, ხაზი გაუსვა მან და დაამატა, რომ ზარებს სახელმწიფოსმეთაურის გრაფიკისთვის ხელი არ შეუშლია.

პესკოვმა თქვა, რომ ნაღმების არსებობის შესახებ ცნობები ასევე საზღვარგარეთიდან შემოდიოდა და დაამატა, რომ სატელეფონო ზარების ავტორები ჯერჯერობით დადგენილი არ არიან, მაგრამ მტკიცე იმედი გამოთქვა, რომ ადრე თუ გვიან „ამ სატელეფონო ხულიგნების, სატელეფონო ტერორისტების ვინაობა დადგინდება და ისინი სათანადოდო დაისჯებიან“.

სატელეფონო ზარების ტალღამ რუსეთი 11 სექტემბრიდან მოიცვა და 75 რეგიონს შეეხო. ორი თვის განმავლობაში, ცრუ სატელეფონო შეტყობინებები ბომბების არსებობის შესახებ 186 ქალაქში განხორციელდა და ამ ხნის განმავლობაში 2 მილიონ 300 ათასზე მეტი ადამიანის ევაკუაცია მოხდა, მათ შორის 250 000-ზე მეტის მოსკოვში. არც ერთ შემთხვევაში აფეთქების საფრთხე არ დადასტურებულა. ФСБ-ს შეფასებით, მხოლოდ მოსკოვში, „ნაღმის არსებობის“ გამო გამოწვეულმა ზარალმა 150 მილიონი რუბლი შეადგინა.