„ერთიანი ნაციონალური მოძრაობის" პოლიტიკური საბჭოს თავმჯდომარე უკრაინიდან საქართველოს მოქალაქეების გამოძევების ფაქტს უკრაინისა და საქართველოს მთავრობებს შორის შეთანხმებას უკავშირებს.

ნიკა მელია ფიქრობს, რომ შეთანხმება და კონკრეტული გეგმა საქართველოს ყოფილ პრემიერ მინისტრს, ბიძინა ივანიშვილსა და უკრაინის პრეზიდენტს, პეტრო პოროშენკოს შორის არსებობს, მოვლენები კი, კონკრეტული გეგმის მიხედვით ვითარდება.

„ისევე როგორც უკრაინის მთავრობამ და ხელისუფლებამ ფეხქვეშ გათელა უკრაინის კონსტიტუცია და უკრაინის კანონმდებლობა და შეურაცხმყოფელი, ადამიანისთვის ღირსების ამყრელი მეთოდებით გაიტაცეს სახლებიდან, საცხოვრებელი ბინებიდან საქართველოს მოქალაქეები, სამი დღის განმავლობაში გაურკვეველი მიმართულებით უკანონო პატიმრობაში ჰყავდათ, აი, სწორედ ასევე, საქართველოს ხელისუფლება მოქმედებდა. რასთან გვაქვს საქმე? ვერც უკრაინის ხელისუფლება და ვერც საქართველოს ხელისუფლება ფეხქვეშ ვერ გათელავდა სახელმწიფო კონსტიტუციებს, რომ არ ყოფილიყო მათ შორის ურთიერთშეთანხმება. ამას ბავშვიც ხვდება, რომ პოროშენკოსა და ივანიშვილს შორის არის შეთანხმება, გეგმა და ამ გეგმის მიხედვით ისინი მოქმედებენ", განუცხადა „რუსთავი 2"-ს ნიკა მელიამ საქართველოს საგარეო საქმეთა სამინისტროსთან, სადაც აქცია გაიმართა.

აქციაზე შეკრებილების თქმით, უკრაინაში საქართველოს მოქალაქეების გატაცების და რამდენიმე დღით გაუჩინარების ფაქტზე, საგარეო საქმეთა სამინისტროს სათანადო რეაგირება არ მოუხდენია.

უკრაინიდან საქართველოს 8 მოქალაქე გამოაძევეს. უკრაინის უშიშროების სამსახურმა განაცხადა, რომ საქართველოს მოქალაქეები, რომელთა საქმიანობაც ეროვნული უსაფრთხოების ინტერესებს ეწინააღმდეგება, უკრაინის ტერიტორიიდან გამოაძევეს.