საქართველოს ნავთობისა და გაზის კორპორაციის სამმართველოს უფროსი, ჟურნალისტი ნინო ჯღარკავა ბიძინა ივანიშვილს მიმართავს და ამტკიცებს, რომ „საქმე იმაზე ცუდადაა“, ვიდრე ეს ყოფილ პრემიერ მინისტრს წარმოუდგენია, რადგან ჯღარკავას თქმით, დღევანდელ პარლამენტში „ქართული ოცნების“ სახელით ისეთი ადამიანები არიან შესული, რომლებიც თავად მას (ბიძინა ივანიშვილს) ებრძოდნენ 2012 წელს და „ერთადერთი პატიოსანი კაცი“, ვისაც ივანიშვილისთვის და ხალხისთვის არ უღალატია ირაკლი ღარიბაშვილია.

„ბატონო ბიძინა, ერთი ცალი თვალით გადმოიხედეთ და კარგად დაინახავთ ვინ არიან დღეს პარლამენტში, რა ხალხი მოვიდა თქვენს გაკვალულ გზაზე, გადმოიხედეთ და წვრილად მოგიყვებით ერთი დეპუტატის ამბავს, ემისრებს როგორ აგზავნიდა 250 000 დოლარის სანაცვლოდ ადვოკატთა ასოციაციის თავმჯდომარის პოსტზე, ღარიბაშვილთან მიმეგზავნეთო, მისი შუამავალი იხვეწებოდა, ფეხი არ ჩაუვიდა იქ და დღეს თავად განაგებენ ახალ ოცნებას, გადმოიხედეთ და წვრილად მოგიყვებით, თქვენ რომ გებრძოდა ის ხალხი როგორ შემოგვაპარეს ნელ-ნელა და ჩვენ უმცირესობაში როგორ დავრჩით, გადმოიხედეთ და მოგიყვებით, როგორ უთხრიან ძირს ერთმანეთს გუნდის წევრები, გადმოიხედეთ და იქნებ ერთხელაც 41 ნომრის მაგივრად, 5 ნომერი შეგრჩეთ ხელში. დღეს ასეა საქმე, 4 პლიუს 1, ოღონდ მინუს სააკაშვილი! სხვა ყველა ადგილზეა, ოცნების ახლანდელ წევრებს რომ კითხო სად იყვნენ 2012 წელს, თამამად გიპასუხებენ პარტიზანულად ვიბრძოდითო, საქმე იმაზე ცუდადაა ვიდრე წარმოგიდგენიათ, მგონი ოცნებას ყავლი გაუვიდა! ერთადერთი პატიოსანი კაცი, ვისაც თქვენთვის და ხალხისთვის არ უღალატია ირაკლი ღარიბაშვილია! დაგვიბრუნეთ ხალხს, ხალხის რჩეული! ვიცი რომ ამ წერილს აუცილებლად წაიკითხავთ, ისიც ვიცი, რომ ჩვენ არ მიგვატოვებთ!“ წერს ჯღარკავა სოციალურ ქსელში.