თბილისის 51-ე საჯარო სკოლის მიმდებარე ტერიტორიაზე, ხორავას ქუჩის ერთ-ერთი საცხოვრებელი კორპუსის ეზოში მომხდარი მკვლელობის საქმესთან დაკავშირებით პირველი კომენტარი გააკეთა 51-ე საჯარო სკოლის დირექტორმა მანანა თურქაძემ.

მან „რუსთავი 2“-ის გადაცემა „პოსტ-სკრიპტუმის“ ეთერში პირდაპირი სატელეფონო ჩართვისას უარყო საქართველოს მთავარი პროკურატურის მიერ გავრცელებული განცხადება, რომ ხორავას ქუჩაზე მომხდარ ფაქტს წინ უძღოდა სკოლის საპირფაშეროში მოზარდებს შორის პნევმატური იარაღით დაპირისპირება და აღნიშნა, რომ მოსწავლის მხრიდან გამოყენებული იყო „სათამაშო პლასტმასის თოფი“ და არა პნევმატური იარაღი.

„ჩვენთვის ძალიან მძიმეა პროკურატურის განცხადება, რაც თქვა მან, თუ რა უძღოდა წინ ტრაგედიას. ჩვენ ადმინისტრაცია ვინაწილებთ ამ პასუხისმგებლობას, მაგრამ ხაზგასმით უნდა გითხრათ, რომ აქ საუბარია სათამაშო პლასტმასის თოფზე და არა პნევმატურ იარაღზე და მე მინდა დავამშვიდო საზოგადოება და ყველა ჩვენი მშობელი, რომ სკოლაში არც ერთი ასეთი შემთხვევა არასდროს არ ყოფილა, რომ პნევმატური იარაღი შემოსულიყო და არც ეს არ იყო პნევმატური იარაღი, თუმცა ისიც რომ ცნობილი ყოფილიყო, რომ სათამაშო იარაღი ყოფილიყო სკოლაში, სათამაშო თოფი, თუ როგორ ჰქვია მას, პლასტმასის, ამასაც რა თქმა უნდა აღვკვეთავდით“, თქვა სკოლის დირექტორმა, რომელმაც აღნიშნა, რომ მოზარდებთან ერთად დაკითხვაზე თავადაც იმყოფებოდა.

მან გაიხსენა ის მდგომარეობა რაც სკოლაში სუფევდა იმ დრომდე, სანამ მოზარდები დატოვებდნენ შენობას. „მთელი დღე სკოლაში იყო სიმშვიდე, სკოლაში არ ყოფილა სიტუაცია, რომელსაც მანდატურის განმუხტვა დასჭირვებოდა, შესაბამისად, მანდატურს სკოლაში სიტუაცია არ განუმუხტავს“, განაცხადა მანანა თურქაძემ და ხაზი გაუსვა, რომ მანდატურებმა არაფერი იცოდნენ მოზარდებს შორის სკოლის შენობის საპირფაშეროში მომხდარ დაპირსპირებაზე.

„მანდატურებს რომ ასეთი რამ სცოდნოდათ, რა თქმა უნდა, ეს არ მოხდებოდა. მინდა ხაზი გავუსვა იმასაც, რომ გაჟღერდა თქვენი ეთერითაც და ზოგადად, რომ სკოლიდან ბავშვები გავიდნენ ადრე და უნდა გითხრათ, რომ ბავშვები გაკვეთილების დასრულებამდე, ბოლომდე, მე-6 გაკვეთილის დასრულებამდე, ორივე მოზარდი და ყველა იჯდა გაკვეთილზე მშვიდად, ყვებოდნენ გაკვეთილს. ერთს სპორტი ჰქონდა და მასწავლებელს ეთამაშა და მოუგო ფრენბურთი ერთ-ერთ გარდაცვლილს და მასწავლებელმა გამოაცილა, სპრტის მასწავლებელმა - უბრალოდ პირველ სართულზეა და გარეთ გამოჰყვა მათ, ისე ამოიყვანა, როგორც ყოველთვის ხდება, და მეორეს ჰქონდა მათემატიკა და საკმაოდ აქტიური იყო მათემატიკის გაკვეთლზეც და ასე რომ, აქ რაღაცა წინასწარ განზრახული დაპირისპირება სკოლის მხრიდან ნამდვილად არ ყოფილა“, აღნიშა 51-ე საჯარო სკოლის დირექტორმა.

მანანა თურქაძემ განაცხადა, რომ „ძალიან დიდი ტრაგედიის“ მიუხედავად, სკოლა მოსწავლეების მისაღებად მზად არის, თუმცა დაამატა, რომ ბავშვებს „ფსიქოლოგიური სამსახური აუცილებლად დასჭირდებათ“.