1-ელ დეკემბერს, თბილისის 51-ე საჯარო სკოლასთან მომხდარ მკვლელობაში ბრალდებულ არასრულწლოვან გ.ჯ.-ს, რომელზეც ძებნა იყო გამოცხადებული და რომელიც დღეს პოლიციას თავად ჩაბარდა, ადვოკატი შეხვდა. ტარიელ კაკაბაძე, რომელიც არასრულწლოვანის ინტერესებს იცავს, აცხადებს, რომ ბრალდებულმა მას მოუყვა, თუ რა მოხდა მკვლელობის ადგილას და აზუსტებს, რომ „მას ნამდვილად ჰქონდა დანა, რომელიც მან გამოიყენა მხოლოდ ერთხელ“.

„მე პირველად შევხვდი ბრალდებულს, გავესაუბრე მას და მომიყვა, თუ რა მოხდა ზოგადად. ბრალდებული ამბობს, რომ მას ნამდვილად ჰქონდა დანა, რომელიც მან გამოიყენა მხოლოდ ერთხელ, მხოლოდ ერთხელ. შესაბამისად, თუ დავუჯერებთ მის ჩვენებას, ჩანს, რომ სხვა დაზიანებები, რომელიც დაზარალებულს აქვს მიყენებული, სავარაუდოდ, მიაყენეს უკვე მოგვიანებით სხვა პირებმა. ძალიან მნიშვნელოვანია, თუ რას გვეტყვის ექსპერტიზის დასკვნა და რას გვეტყვიან ექსპერტები, რომლებიც დაიკითხებიან. ჩემი ვარაუდით, ჩემი ვარაუდით, ეს დაზიანებები არ უნდა იყოს მიყენებული ერთი ან შესაძლოა, მხოლოდ ორი პირის მიერ“, უთხრა ადვოკატმა სამაუწყებლო კომპანია„რუსთავი 2“-ის საინფორმაციო პროგრამა „კურიერს“ პირდაპირ ეთერში ჩართვისას.

ბრალდებულის ადვოკატმა აღნიშნა, რომ იგეგმება სხვადახვა მოწმეების დაკითხვა და მათ შორის მათი თავიდან დაკითხვაც, რომლებიც უკვე დაიკითხნენ და რომელთა ჩვენებებიც უკვე დევს საგამოძიებო საქმეში.

„მინდა განვაცხადო, როგორც ბრალდებულის ადვოკატმა, რომ მე არ ვაპირებ ხელი დავაფარო თუნდაც ბრალდებულს, თუ მან ჩაიდინა კონკრეტული დანაშაული სრულად - ანუ თუ მას დაუდასტურდა მთლიანად ბრალდება. მე მსურს, მოვუსმინო ექსპერტებს და თუ ექსპერტებმა თქვეს, რომ იმ პირობებში შეუძლებელია დაზარალებულს მიდგომოდა აღნიშნული სადისტური ჭრილობები, როგორ პირობებსაც მოწმეები აღწერენ და თუ დადგინდა მტკიცებულებებით, რომ ის ჭრილობები სულ სხვა პირებმა მიაყენეს, მაშინ ჩვენ მოვითხოვთ იმ პირების პასუხისგებაში მიცემას, ვინც რეალურად მიაყენა აღნიშნული ჭრილობები დაზარალებულს“, განაცხადა ტარიელ კაკაბაძემ.