საქართველოს პრემიერ მინისტრმა, გიორგი კვირიკაშვილმა, საქართველოს სოფლის მეურნეობის მინისტრ ლევან დავითაშვილთან და საქართველოში ევროკავშირის ელჩ იანოშ ჰერმანთან ერთად, სოფლისა და სოფლის მეურნეობის განვითარების ევროპის სამეზობლო პროგრამის (ENPARD) პირველი ფაზის (2014 – 2017 წწ) შედეგები კონფერენციაზე “სოფლად უკეთესი ცხოვრებისთვის“ შეაჯამა.
პროგრამის ფარგლებში სოფლად მცხოვრებმა ადამიანებმა ევროკავშირის პირდაპირი დახმარება მიიღეს. პრემიერ მინისტრმა ამ პროგრამის ფარგლებში განხორციელებული პროექტების გამოფენა დაათვალიერა და კონფერენციის მონაწილეებს სიტყვით მიმართა:
„მოგესალმებით ქალბატონებო და ბატონებო, მივესალმები დიპლომატიური კორპუსის წარმომადგენლებს, მთავრობის წევრებს, პარლამენტის წარმომადგენლებს. განსაკუთრებულად მივესალმები ფერმერებს, რომლებიც ქმნიან ჩვენი ქვეყნის ეკონომიკის და სოფლის მეურნეობის განვითარების დინამიკას.
მინდა გულწრფელი მადლიერება გამოვთქვა ევროკავშირის მიმართ იმ უმნიშვნელოვანესი დახმარებისათვის, რომელსაც ის უწევს ჩვენს ქვეყანას. განსაკუთრებით აღსანიშნავია სოფლის მეურნეობისა და სოფლის განვითარების კუთხით ევროკავშირის დახმარება, რასაც ჩვენ აღვიქვამთ როგორც ნდობას ჩვენი პარტნიორების მხრიდან და ამავე დროს დასტურს, რომ რეფორმები, რომელიც მიმდინარეობს ჩვენს ქვეყანაში, სწორი მიმართულებით ვითარდება.
ENPARD-ის III ფაზით გამოყოფილი 77.5 მილიონი ევრო, ჯამში კი, სამივე ფაზით მიღებული 180 მილიონი ევროს დახმარება, უდიდესი მნიშვნელობისაა ჩვენი ქვეყნისთვის, რადგან სოფლის ფეხზე დაყენება და სოფლის მეურნეობის განვითარება ჩვენ ერთ-ერთ მთავარ პრიორიტეტად დავისახეთ.
დღეისათვის ამ დარგში მართლაც მნიშვნელოვანი პროგრესი გვაქვს და ეს არის მთავრობის, საერთაშორისო დონორი ორგანიზაციების, პარტნიორი ქვეყნების და კერძო სექტორის კოორდინირებული და ეფექტიანი თანამშრომლობის შედეგი.
უნდა აღვნიშნო, რომ ევროკავშირთან ასოცირების შეთანხმების ხელმოწერის შემდეგ, საქართველო სრულიად ახალი შესაძლებლობების წინაშე დადგა და რა თქმა უნდა ეს შესაძლებლობები გულისხმობს იმ ძალიან მნიშვნელოვან გასატარებელ რეფორმებს, რომელსაც ჩვენ ვახორციელებთ. ჩვენ ეტაპობრივად ვასრულებთ ყველა ნაკისრ ვალდებულებას და ამ პროცესში ევროკავშირი ჩვენი აქტიური მხარდამჭერია.
ჩვენი მთავრობის მიზანია ხელი შეუწყოს ბიზნესზე ორიენტირებული სოფლის მეურნეობის განვითარებას და საქართველოს აგროსასურსათო პროდუქციის ექსპორტიორ ქვეყნად ჩამოყალიბებას. ამ მიზნის მისაღწევად ჩვენ არაერთ პროექტს ვახორციელებთ, რომლებშიც გვეხმარება სოფლის მეურნეობისა და სოფლის განვითარების ევროპის სამეზობლო პროგრამა. მოგეხსენებათ, ENPARD-ი 2013 წლიდან საქართველოს აქტიური მხარდამჭერია და სწორედ მისი ხელშეწყობითა და დაფინანსებით გახდა შესაძლებელი სოფლის მეურნეობის ინსტიტუტების ეფექტიანობის გაზრდა და სოფლის მეურნეობის სექტორის რეფორმირება; სოფლად სოციალური და ეკონომიკური შესაძლებლობების ხელშეწყობა, დასაქმებისა და საცხოვრებელი პირობების გაუმჯობესება, რაც მოხერხდა მცირე ფერმერული კოოპერატივების გაძლიერებითა და რესურსებზე ხელმისაწვდომობის უზრუნველყოფით.
რამდენიმე კონკრეტულ მაგალითზე მინდა გავაკეთო აქცენტი: ევროკავშირის პირდაპირი დაფინანსება და ტექნიკური მხარდაჭერა 280-ზე მეტმა კოოპერატივმა მიიღო. ათასზე მეტმა კოოპერატივმა მიიღო გრანტი. 2015 წელს ევროკავშირმა დაიწყო და წარმატებით განხორციელდა სოფლის განვითარების საპილოტე პროექტები ლაგოდეხში, ბორჯომსა და ყაზბეგში. სოფლის განვითარების 120-ზე მეტი ინიციატივა დაფინანსდა ისეთ სფეროებში, როგორიცაა სოფლის მეურნეობა, ტურიზმი, სოციალური სერვისები, ინფრასტრუქტურა და გარემოს დაცვა. ამ ინიციატივების ფარგლებში დასაქმდა 700-ზე მეტი ოჯახი და 8 ათასზე მეტმა სოფლად მცხოვრებმა გაიუმჯობესა საცხოვრებელი პირობები.
რაც შეეხება ENPARD-ის III ფაზას, შეთანხმების თანახმად, ეს თანხები მოხმარდება სოფლად მცხოვრები მოსახლეობის საცხოვრებელი და სამუშაო პირობების გაუმჯობესებას. ჩვენთვის ძალიან მნიშვნელოვანია, რომ პროგრამაში დიდი ადგილი ეთმობა გარემოს დაცვის საკითხებს და გარემოსდაცვითი პოლიტიკის გაუმჯობესებას. ეს ეხმიანება ჩვენს ახალ სტრუქტურულ ცვლილებებს, რომლითაც გარემოს დაცვა და სოფლის მეურნეობა ერთი სტრუქტურული ორგანიზმი იქნება.
დარწმუნებული ვარ, რომ ENPARD-ის III ფაზის დაფინანსება ისეთივე ხელშესახები შედეგების მომტანი იქნება, როგორც ეს წინა ორი ფაზით გამოყოფილი თანხების ათვისებისას მოხდა.
კიდევ ერთხელ მინდა მადლობა გადავუხადო ევროკავშირის წარმომადგენლობას საქართველოში, პირადად ბატონ იანოშ ჰერმანს, რომელიც პირადადაა ჩართული ამ პროგრამების აქტიური და წარმატებული იმპლემენტაციის პროცესში და მადლობა მინდა გადავუხადო ევროკავშირს, იმ შესაძლებლობის გახსნისთვის, რომელიც საქართველომ მიიღო ასოცირების ხელშეკრულების და ღრმა და ყოვლისმომცველი თავისუფალი სავაჭრო სივრცის შესახებ ხელშეკრულების შედეგად. ეს ხელშეკრულებები სრულიად ახალ პოტენციალს ხსნის საქართველოს სოფლად მაცხოვრებელი მოსახლეობისათვის და მე დარწმუნებული ვარ, რომ ჩვენ თანმიმდევრული ნაბიჯების წარმატებული გადადგმით, რომელსაც ვდგამთ სოფლად მაცხოვრებელ მოსახლეობასთან ერთად, მნიშვნელოვნად გავაუმჯობესებთ სოფლად ცხოვრების პირობებს და კოოპერაციის მეშვეობით, რომელიც განსაკუთრებულად მნიშვნელოვანია საქართველოსთვის, შევძლებთ იმას რომ საქართველოს პირობებში ყველაზე სწორი პირობები ჩამოვაყალიბოთ საჭირო მასშტაბის ეკონომიკის მისაღწევად და ქართული პროდუქციის ევროკავშირის ბაზარზე გასასვლელად“.
ინფორმაციას პრემიერ მინისტრის პრესსამსახური ავრცელებს.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.