მესტიის მუნიციპალიტეტის 2018 წლის ბიუჯეტი, 2017 წლის მონაცემებთან შედარებით 1 მილიონი ლარით იზრდება და მთლიანობაში 7 მილიონ 412 ათას ლარს შეადგენს, ხოლო ერთ-ერთი მთავარი მიმართულება, რაც მომავალი 4 წლის განმავლობაში ადგილობრივი ხელისუფლების განსაკუთრებული ზრუნვის საგანი უნდა იყოს, ეს ზემო სვანეთის ყველა სოფელში სასმელი წყლისა და საკანალიზაციო სისტემების მოწესრიგებას უკავშირდება, განუცხადა GUARDIAN.GE-ს მესტიის მერმა, კაპიტონ ჟორჟოლიანმა.

„2018 წლის ბიუჯეტი მილიონით მეტი იქნება და ის მთლიანობაში 7 მილიონ 412 ათა ლარს მოიცავს. გეგმაში გვაქვს დავასრულოთ შიდა გზების პროექტირება დაბა მესტიაში, ჯერ აქ და შემდეგ სოფლებში, 400 000 ლარს ვითვალისწინებთ სოფლებში წყლის სისტემების და კანალიზაციის მოსაწესრიგებლად. ზოგადად, ეს 4-წლიანი გეგმაა, რომლის დასრულების შემდეგაც სვანეთში მცხოვრებ ყველა ოჯახში უნდა იყოს შეყვანილი წყალი და ყველა სოფელში უნდა იყოს მოწესრიგებული კანალიზაციის სისტემა, რომ შემდგომ კიდევ უფრო მეტად მოხდეს ტურისტული ინფრასტრუქტურის განვითარება. მოგეხსენებათ, სვანეთი ისეთი ადგილია, რომ ყველა სოფელში შეიძლება ტურისტული ინფრასტრუქტურის მოწყობა. ჩვენ ყველანაირად ვცდილობთ, რომ მოსახლეობას მაქსიმალურად შევუწყოთ ხელი - წყლისა და საკანალიზაციო სისტემების მოწყობით კი თითოეულ სოფელსა და ოჯახს მეტი პერსპექტივა ექნება“, განაცხადა მესტიის მუნიციპალიტეტის მერმა, რომელმაც მიმდინარე წლის მნიშვნელოვან ინფრასტრუქტურულ საკითხებზე გაამახვილა ყურადღება.

(კაპიტონ ჟორჟოლიანი, მესტიის მუნიციპალიტეტის მერი, GUARDIAN.GE-ის ფოტო)

მან თქვა, რომ 2017 წელს მუნიციპალიტეტში ორი საბავშვო ბაღის მშენებლობა დასრულდა, ხოლო ხაიშში, იდლიანში, ფარში და ეცერში, სადაც ჯამში 4 ბაგა-ბაღის მშენებლობა დაწყებულია, სამუშაოების დასრულება 2018 წელს მოხდება, ასევე სრულად, მომავალ წელს შევა ექსპლუატაციაში ოთხი სპორტსკოლაც.

„რაც შეეხება სპორტსკოლებს, შარშან სოფლის მხარდაჭერის პროგრამით იყო დაგეგმილი პირველი ეტაპის სამუშაოების შესრულება, მცირედი დაფინანსების პირობებში, სოფლის მცხოვრებთა სურვილით დავიწყეთ შარშან და ოთხივეგან ჩატარდა სამუშაოები, შიდა რემონტები დარჩა, რაც მომავალ წელს გაგრძელდება“, აღნიშნა მესტიის მერმა, რომელიც როგორც მუნიციპალიტეტისთვის, ისე დაბისთვის, მნიშვნელოვნად მიიჩნევს საგზაო ინფრასტრუქტურის მწყობრში მოყვანას.

„მესტიაში, მგფ-ის დაფინანსებით უშბის ქუჩის რეაბილიტაცია პრაქტიკულად უკვე განხორციელდა, ასფალტ-ბეტონის საფარი მთლიანობაში მოწყობილია, მაგრამ გარკვეული სამუშაოები დარჩა დასასრულებელი, რადგან ხელი კლიმატურმა პირობებმა შეგვიშალა, თუმცა ძირითადი ნაწილი, სამუშაოების 95% დასრულებულია. გარდა ამისა, დაწყებულია და სამუშაოების უმეტესი ნაწილი შესრულებულია მესტია-აეროპორტის გზის მიმართულებით. რეგიონული განვითარებისა და ინფრასტრუქტურის სამინისტროს, ჩვენი თხოვნით, 3-კილომეტრიანი გზა უნდა გაეკეთებინა, აქედან 2 კმ გაკეთებულია, მაგრამ ვინაიდან დანარჩენ მონაკვეთზე მიწის ქვეშ მილები უნდა ჩადებულიყო, წელს სრულად არ დაგებულა ასფალტ-ბეტონის საფარი, თუმცა მომავალ წელს აუცილებლად დასრულდება გზის დარჩენილ მონაკვეთზე შესასრულებელი სამუშაოები. ამ მხრივ, მოსახლეობა ძალიან მადლიერია“, განაცხადა კაპიტონ ჟორჟოლიანმა, რომელმაც 2017 წელს ადგილობრივი ხელისუფლების და მუნიციპალიტეტის რამდენიმე სოფლის მცხოვრებთა ერთ-ერთ მთავარ გამოწვევად სტიქიის წინააღმდეგ ბრძოლა დაასახელა.

(ზემო სვანეთი, GUARDIAN.GE-ის ფოტო)

„წელს ორჯერ მოგვიწია სტიქიასთან ბრძოლა და ამ მიმართულებითაც მთლიანობაში ძალიან ბევრი სამუშაოები ჩატარდა მუნიციპალიტეტის მასშტაბით. მთავრობამ სტიქიის სალიკვიდაციო სამუშაოებზე ფინანსური დახმარება გაგვიწია და ამ კუთხით, სამუშაოები დასრულებულია.

„ბეჩოში დოლის ღელეზე, რომელიც მოსახლეობას ყოველწლიურად უქმნიდა საფრთხეს, გაკეთდა რკინა-ბეტონის არხი, რაზეც დაახლოებით 904 000 ლარი დაიხარჯა. ასევე დამცავი გაბიონები გაკეთდა მულახის თემში, კერძოდ სოფელ ჩვაბიანში, ასევე დაწყებულია სოფლებთან დამაკავშირებელი ოთხი ხიდის მშენებლობა, ესაა კალაში 2, იფარში 1 და ადიშის გზაზე 1, ეს იქნება რკინა-ბეტონის ხიდები, სამუშაოების 50% შესრულებულია და ამ ეტაპისთვის, თოვლისა და ყინვის გამო, სამუშაოები შეჩერებული გვაქვს და, როგორც კი კლიმატური პირობები მოგვცემს საშუალებას, მუშაობა განახლდება.

(ზემო სვანეთი, GUARDIAN.GE-ის ფოტო)

„ადიშის საავტომობილო ხიდის მშენებლობა, წვირმიშის საავტომობილო გზის აღდგენა, ეს დაახლოებით, 122 000 ლარი დაგვიჯდა და სამუშაოები დასრულებულია. მულახის ტერიტორიულ ერთეულთან დამაკავშირებელი საავტომობილო ხიდის მშენებლობაზე ტენდერი ახლა გამოვაცხადეთ, ტენდერებმა გაგვიგრძელა პროცესი და პროექტი გარდამავალში გადავიდა. ჭუბერის ტერიტორიულ ერთეულში, მულახის თემში და სხვაგან, სოფლებთან დამაკავშირებელ გზებზე გაბიონების მოწყობა და მდინარის კალაპოტის განტვირთვა მოხდა, დავასრულეთ ასევე სტადიონის საყრდენი რკინა-ბეტონის კედლის მშენებლობა, საჯარო სკოლის მიმდებარე ტერიტორიის სანიაღვრე არხის მოწყობა.

(ზემო სვანეთი, სოფელი ეცერი, GUARDIAN.GE-ის ფოტო)

„2017 წელს რეგიონული პროექტებიდან 2 მილიონი გვაქვს, ამას დაემატა სტიქიის სალიკვიდაციო ღონისძიებებისთვის მილიონ ორასი ათასი და მილიონ 600 ათასი მეორე, რომელიც ახლა გამოგვიყვეს“, უთხრა GUARDIAN.GE-ს კაპიტონ ჟორჟოლიანმა და დაამატა, რომ დაბა მესტიაში უნიკალური თეატრის მშენებლობის მრავალმილიონიანი პროექტი ხორციელდება, რომელიც მომავალი წლის მაისის ბოლოს უნდა დასრულდეს.

„ჩვენ ვახორციელებთ 4-მილიონიან პროექტს თეატრის მშენებლობის, რომელიც მომავალ წელს უნდა დასრულდეს. მგფ-მა გამოაცხადა ტენდერი ჩვენი თანამონაწილეობით, 600 000-ს ჩვენ ვიხდით, ძირითადი სამუშაოები შესრულებულია. ახლა სცენის მოწყობა და შიდა სამუშაოები მიმდინარეობს და დაახლოებით, მაისის ბოლოს პროექტი უნდა დასრულდეს. აქ მთლიანობაში კულტურის ცენტრი იქნება მოწყობილი, თავისი ამფითეატრით, ეს იქნება ისეთი ადგილი, კულტურული კომპლექსი, სადაც ნებისმიერს დასვენების საშუალება ექნება“, განაცხადა კაპიტონ ჟორჟოლიანმა და დასძინა, რომ 23დეკემბერს, მესტია- ჰაწვალის დამაკავშირებელი საბაგირო იხსნება, რაც უმოკლესი და უსწრაფესი გზა იქნება ტურისტებისთვის ჰაწვალთან დასაკავშირებლად.