ამერიკის შეერთებული შტატების პრეზიდენტმა, დონალდ ტრამპმა გაერო-ს უშიშროების საბჭოს მიერ ჩრდილოეთ კორეაზე მისი ბალისტიკური რაკეტების გამოცდის გამო მკაცრი სანქციების დაწესება მოიწონა და განაცხადა, რომ კენჭისყრამ დაადასტურა, რომ მსოფლიოს „სურს მშვიდობა და არა სიკვდილი“.

„გაერთიანებული ერების ორგანიზაციის უშიშროების საბჭომ ახლახან 15-0 წინააღმდეგ უყარა კენჭი ჩრდილოეთ კორეაზე დამატებით სანქციებს. მსოფლიოს სურს მშვიდობა და არა სიკვდილი!“ დაწერა ტრამპმა „თვითერზე“.

გაერთიანებული ერების ორგანიზაციის უშიშროების საბჭომ პარასკევს კენჭი უყარა წინადადებას ჩრდილოეთ კორეის მიმართ ახალი ძლიერი სანქციების დაწესების თაობაზე, რაც ფხენიანის მიერ ბოლოდროინდელი ბალისტიკური რაკეტების გაშვებას უკავშირდება.

BBC-ის ცნობით, შეერთებული შტატების მიერ შემუშავებული რეზოლუცია მოიცავს ზომებს, რომელიც ქვეყნის საწვავის იმპორტის 90%-ამდე შემცირებას ითვალისწინებს.

ჩინეთმა და რუსეთმა, ჩრდილოეთ კორეის მთავარმა სავაჭრო პარტნიორებმა რეზოლუციის სასარგებლოდ მისცეს ხმა.

ფხენიანის მიმართ აქამდე უკვე არაერთი სანქციაა დაწესებული აშშ-ის, გაეროს და ევროკავშრის მხრიდან.

ვაშინგტონი ფხენიანის მიმართ სანქციებს 2008 წლის შემდეგ აწესებს და მას უკვე გაყინული აქვს იმ ინდივიდების და კომპანიების ანგარიშები, რომლებიც დაკავშირებული არიან ჩრდილოეთ კორეის ბირთვულ და სარაკეტო პროგრამებთან და ამავე დროს თეთრი სახლი კრძალავს საქონლის ექსპორტს და მომსახურებებს ქვეყანაში.

აშშ-ის ელჩმა გაეროში, ნიკი ჰელიმ განაცხადა, რომ სანქციებმა „ფხენიანს უეჭველი შეტყობინება გაუგზავნა იმის თაობაზე, რომ შემდგომი უპატივცემულობა, შემდგომ დასჯას და იზოლაციას წარმოშობს“.