ირანის რევოლუციურმა მცველებმა გააფრთხილეს ანტი-სამთავრობო პროტესტანტები, რომ ისინი სახელმწიფოსაგან „რკინის მუშტს“ მიიღებენ, თუკი პოლიტიკური არეულობა გაგრძელდება.

ირანში უკვე სამი დღეა რაც ფასების მატებისა და ცხოვრების დონის გაუარესების გამო მასობრივი დემონსტრაციები იმართება. მაგრამ რევოლუციური მცველების მეთაურმა განაცხადა, რომ პროტესტი სოციალური მოთხოვნებიდან პოლიტიკურ ლოზუნგებში და საზოგადოებრივი ქონების დაწვაში გადაიზარდა.

გავრცელებული ცნობებით, გარდაცვლილია ორი ადამიანი.

BBC-ის ცნობით, ქალაქებში: ხორამაბადში, ზანჯანსა და ავაზში გამართულ ანტი-სამთავრობო დემონსტრაციებზე ირანის სულიერი ლიდერის, აიათოლა ალი ხამენეის სიკვდილის შესახებ მოწოდებები გაისმა.

ბრიგადის გენერალმა ისმაილ კოვსარიმ ახალი ამბების სააგენტო „ISNA“-ს უთხრა: თუკი ხალხი ქუჩებში მაღალი ფასების გამო გამოვიდა, მათ არ უნდა ეყვირათ ასეთი ლოზუნგები და დაეწვათ საზოგადოებრივი ქონება და ავტომანქანები“.

ირანის შინაგან საქმეთა მინისტრმა ასევე გააფრთხილა საზოგადოება, რომ მოერიდონ „არაკანონიერ შეკრებებს“.

ამერიკის შეერთებული შტატები აცხადებს, რომ „მსოფლიო უყურებს“, თუ როგორ პასუხობს ირანული ხელისუფლება ანტი-სამთავრობო პროტესტს, რომელმაც რამდენიმე ქალაქში იფეთქა.

თეთრი სახლის განცხადებაში ნათქვამია, რომ ირანელებს ყელში ამოუვიდათ „რეჟიმის კორუფცია და მის მიერ ერის სიმდიდრის ტერორიზმის დაფინანსებაში გაფლანგვა“.

გავრცელებული ცნობებით, პროტესტის გამოსახატად ათასობით ადამიანი გამოვიდა ირანის ქალაქების ქუჩებში.

„ირანულმა მთავრობამ პატივი უნდა სცეს თავისი ხალხის უფლებებს, მათ შორის მათ უფლებას გამოხატონ თავიანთი თავი. მსოფლიო უყურებს“, განაცხადა თეთრი სახლის პრეს-მდივანმა სარა ჰაკაბი სანდერსმა „თვითერზე“, რომლის განცხადებაც მოგვიანებით პრეზიდენტ დონალდ ტრამპის „თვითერზეც“ გავრცელდა.

შეერთებული შტატების სახელმწიფო დეპარტამენტმა დაჟინებით მოუწოდა ყველა სახელმწიფოს „საჯაროდ დაუჭირონ მხარი ირანელ ხალხს და მათ მოთხოვნებს უმთავრესი უფლებების დაცვისა და კორუფციის დასასრულებლად“.