ჩეჩნეთის ხელმძღვანელი რამზან კადიროვი ირანში საპროტესტო აქციების მონაწილეებისთვის მხარდაჭერის შესაძლო გაწევასთან დაკავშირებით შეერთებული შტატების პრეზიდენტის, დონალდ ტრამპის განცხადებას აკრიტიკებს.

აღნიშნულ ინფორმაციას „რია ნოვოსტი" ავრცელებს.

„დონალდ ტრამპმა განაცხადა, რომ აშშ ირანში საპროტესტო აქციების მონაწილეებს საგრძნობ მხარდაჭერას გაუწევს, როდესაც შესაფერისი დრო დადგება. ირანს „ტროას ცხენს” უმზადებენ“, დაწერა რამზან კადიროვმა „თვითერის“ საკუთარ გვერდზე.

ამერიკის შეერთებული შტატები აცხადებს რომ „მსოფლიო უყურებს“, თუ როგორ პასუხობს ირანული ხელისუფლება ანტი-სამთავრობო პროტესტს, რომელმაც რამდენიმე ქალაქში იფეთქა.

თეთრი სახლის განცხადებაში ნათქვამია, რომ ირანელებს ყელში ამოუვიდათ „რეჟიმის კორუფცია და მის მიერ ერის სიმდიდრის ტერორიზმის დაფინანსებაში გაფლანგვა“.

„ირანულმა მთავრობამ პატივი უნდა სცეს თავისი ხალხის უფლებებს, მათ შორის მათ უფლებას გამოხატონ თავიანთი თავი. მსოფლიო უყურებს“, განაცხადა თეთრი სახლის პრეს-მდივანმა სარა ჰაკაბი სანდერსმა „თვითერზე“, რომლის განცხადებაც მოგვიანებით პრეზიდენტ დონალდ ტრამპის „თვითერზეც“ გავრცელდა.

შეერთებული შტატების სახელმწიფო დეპარტამენტმა დაჟინებით მოუწოდა ყველა სახელმწიფოს „საჯაროდ დაუჭირონ მხარი ირანელ ხალხს და მათ მოთხოვნებს უმთავრესი უფლებების დაცვისა და კორუფციის დასასრულებლად“.