პირველი არხის საინფორმაციო პროგრამა "მოამბის" ყოფილი ჟურნალისტი თინიკო ტერელაძე, რომელიც დიდი ხანია ამერიკის შეერთებულ შტატებში ცხოვრობს და იმ ქვეყნის მოქალაქეა, Facebook - ზე ემოციურ პოსტს აქვეყნებს და იმ მდგომარეობას აღწერს, რასაც ხანგრძლივი ემიგრაციიდან საქართველოში დაბრუნებული ადამიანების დიდი ნაწილი განიცდის.
"რამდენიმე ამბავი დაემთხვა ერთმანეთს. 1) - გელა ჯოხაძის. ბიჭი 16 წელი არ იყო ნამყოფი საქართველოში. ჩავიდა 16 წლის შემდეგ. 1 თვე იყო საქართველოში. 1 თვის შემდეგ უკან დაბრუნდა ამერიკაში და 2 დღეში გული გაუჩერდა საქართველოდან დაბრუნებულს... მეორე ამბავი - ჩემი ბავშვობის მეგობარი, ულამაზესი და წარმატებული გოგო, ძალიან კარგი ოჯახის შვილი მეუბნება, რომ ამერიკით ისე აღფრთოვანდა, სიამოვნებით იცხოვრებდა აქ, საქართველოში უკანგაუხედავად!..
არ ვიცი. უფრო სწორად, ვიცი ეს რაც არის. ერთი სული გაქვს სადმე წახვიდე. წახვალ და მერე ერთი სული გაქვს უკან დაბრუნდე. ჯერ, არ ბრუნდები. მერე, ვეღარ ბრუნდები. ასეთი გაურკვევლობით იწყებ დაბრუნების ლოდინს და ეს ლოდინი განუსაზღვრელი დროით გრძელდება... ჩადიხარ წლების შემდეგ, და სულ სხვა ხალხი გხვდება. აღარც დედა ჰგავს დედაშენს. აღარც მამა - მამაშენს. სულ ყველა შეცვლილია. შენ გგონია, რომ შენ ჩახვედი შეუცვლელი და ისევ ისეთი, როგორიც წამოხვედი, მაგრამ, მათი მზერით ხვდები, რომ მათთვის შენ ხარ ძალიან შეცვლილი... სახლიც სხვანაირი გხვდება. აღარც შენი ნივთები დევს იქ, სადაც დატოვე და სადაც თვალს ახსოვს. რასაც მოიკითხავ, ჯერ ძლივს ხვდებიან რას გულისხმობ და მერე, იწყებენ ძებნა-გახსენებას, შენი სად რა შეინახეს და შეტენეს (ტყუილად ადგილს იკავებდა და მაგიტომ). იცით როგორი გრძნობაა?!- თითქოს სხვა ხალხი და სახლი დატოვე და სულ სხვა დაგხვდა. ის, რაც გენატრებოდა ეს ამდენი წელი, თვალწინ გიდევს, მაგრამ ეს ის არ არის თუ აღარ არის. სულ სხვა რამე, სხვა ვინმეები არიან ოჯახიც, მეგობრებიც, მეზობლებიც, ქუჩაც, სადარბაზოც... საშინელი გაუცხოვება ხდება. უყურებ მშობლებს და ნერვები გეშლება, ვერ ხვდები, ამ რამდენიმე წელში ასე რამ დააბერა ორივე. ნერვები გეშლება და იწყებ ჩხუბს, თუ რატომ ვეღარ დადიან სწრაფად! რამ გაასუქათ! რატომ არ უვლიან თავს!!! თვითონ, ჯერ გიტანენ მონატრებულს და მერე, თვითონაც გირჩევენ საქმეს, - რამ დაგაგლიჯა ასე ნერვები, როცა შენ მაინც ცხოვრობ "კარგ ქვეყანაში"....
მოკლედ, ამ აურზაურში გადის მთელი ის დრო, რა დროითაც ჩასული ხარ საქართველოში. ბოლოსკენ იწყებს ტვინიც და თვალიც ამ გაუცხოვებული გარემოს დალაგებას, ძველებურად აღქმას. თითქოს ამოისუნთქე, თითქოს დარწმუნდი, რომ მოგეჩვენა აქამდე რაც იფიქრე, - შენი ადგილი რომ არსად არის და, ამ ძლივს დალაგებულ გონებაზე უცებ ისევ უკან გიწევს წამოსვლა. ისევ განუსაზღვრელი დროით.... მთელი გზა ფიქრობ, რომ ვერავის და ვერაფერს მოეფერე საკმარისად. ბევრი ისეთი ვინმე და რამე დაგრჩა სანახავი, რომელიც საქართველოში წასვლამდე ყოველდღე გახსოვდა...
ჩამოდიხარ იქ, სადაც უკვე წლებია ცხოვრობ და ყველაფერი თავიდან იწყება... ოღონდ, საქართველოში მომავალ ჩასვლას უკვე სხვანაირად ალაგებ თავში, ფიქრობ, რომ აი მეორედ, უფრო აზრიანად და დალაგებულად ჩახვალ... მეორე ჩასვლის მერეც ასე ფიქრობ მესამე ჩასვლაზე და მესამე ჩასვილს მერეც, -მეოთხეზე....
თქვენ არ იცით ეს რამხელა ემოციაა. გულში გროვდება. იზრდება, დიდდება და როცა გულში ვეღარ ეტევა, გულს ხეთქავს. გულის გახეთქვა ადამიანის სიცოცხლის ბოლო წამია.
რომელი ძალაც არის ყველაზე ძლიერი (ალბათ ღმერთი), დაგვიფაროს ყველა", - წერს ამერიკაში მცხოვრები ქართველი ჟურნალისტი თინიკო ტერელაძე Facebook-ზე.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIANGE.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
GUARDIAN.GE - ჩრდილოეთ კორეის ლიდერი კიმ ჩენ ინი სექტემბერში რუსეთში პრეზიდენტ ვლადიმერ პუტინთან შესახვედრად გამგზავრებას აპირებს, იტყობინება BBC-ის პარტნიორი CBS-ი ამერიკელ ოფიციალურ პირზე დაყრდნობით. ორი ლიდერი განიხილავს შესაძლებლობას, რომ ჩრდილოეთ კორეამ მოსკოვს იარაღი მიაწოდოს უკრაინაში ომის მხარდასაჭერად, განაცხადა ოფიციალურმა წარმომადგენელმა. დაგეგმილი შეხვედრის ზუსტი ადგილი უცნობია. წყაროებმა „The New York Times“-ს განუცხადეს, რომ კიმი, სავარაუდოდ, ბრონირებული მატარებლით გაემგზავრება.