"უკრაინა მე-3 რევოლუციას ვერ გადაიტანს და ვფიქრობ, მე-3 რევოლუცია არც მოხდება", -ამის შესახებ ვიტალი კლიჩკომ კიევში საქართველოს ყოფილ პრეზიდენთან, მიხეილ სააკაშვილთან და სააკაშვილის კიევის უნივერსიტეტის თანაკურსელებთან გაცნობით შეხვედრაზე განაცხადა, სადაც კლიჩკომ და სააკაშვილმა არაფორმალურ ვითარებაში სხვადასხვა საკითხზე ისაუბრეს.

ვიტალი კლიჩკომ, რომელიც უკრაინის საპრეზიდენტო არჩევნებში კენჭისყრას აპირებს, საქართველოზეც ისაუბრა და განაცხადა: "როცა 2006 წელს საქართველოში ვიყავი, ის დანგრეულ მდგომარეობაში იყო, მაგრამ გასულ წელს, როცა მე მიხეილმა იქ მიმიპატიჟა, მე ის ვერც კი ვიცანი. ბათუმი კი სავიზიტო ბარათია. სამწუხაროდ, უკრაინას ამგვარი სავიზიტო ბარათი არ აქვს.

კლიჩკომ ასევე აღნიშნა, რომ მას დიდი პოლიტიკური გამოცდილება არ გააჩნია და მადლობელია იმისათვის, რომ სააკაშვილი მას რჩევებით ეხმარება და მორალურ მხარდაჭერას უცხადებს.

თავის მხრივ, მიხეილ სააკაშვილმა აღნიშნულ არაფორმალურ შეხვედრაზე განაცხადა, რომ უკრაინას დიდი ინტელექტუალური რესურსი აქვს, რომელიც გამოყენებული უნდა იყოს პოლიტიკური მიმართულებით. "ჩვენ ყველამ შევძელით დავხმარებოდით ამ ქვეყანას, რომელიც დიდი მოვლენების, ძალიან სახიფათო მოვლენების ზღურბლზე დგას"' - აღნიშნა საქართველოს ყოფილმა პრეზიდენტმა.

სააკაშვილმა კლიჩკოს პოპულარობაზეც ისაუბრა: "რა არის ვიტალის ძალა? ის რომ, ის სუფთაა, საღია. მე თავად ვნახე მიუნხენში, სადაც ჩვენ ერთად ვიყავით, თუ რამდენად პოპულარულია ის [კლიჩკო] ევროპაში, რამდენად უყვართ იგი იქ. ის უკრაინის სავიზიტო ბარათია, კარგად გამოვიდა კონფერენციაზე, სადაც დაწერილი ტექსტის, ფურცლების გარეშე საუბრობდა, სპონტანურად. მე არაერთხელ ვყოფილვარ ამ კონფერენციაზე, მინახავს კარგი გამოსვლები, მაგრამ ეს იყო პატიოსანი, კარგი გამოსვლა. მას აქვს არაჩვეულებრივი ნიჭიერების მომენტები პოლიტიკაში, თან ეს იყო გამოსვლა კაცისა, რომელიც არ იყო დაკავებული პოლიტიკით და იყო დაკავებული იმით, რითაც იყო დაკავებული... ის გამოვიდა გერმანულ ენაზე, მოკლე, ლაკონური ფრაზებით", - აღნიშნა მიხეილ სააკაშვილმა.