„საავტომობილო გზების რეაბილიტაცია, წყლის გაყვანილობის მოწესრიგება და ცენტრალური სტადიონის გარემონტება - ეს ის პროექტებია, რომელთა განხორციელებაც ახალქალაქის მუნიციპალიტეტში ცოტა ხანში დაიწყება“ - ამის შესახებ guardian.ge-ს ახალქალაქის მუნიციპალიტეტის გამგებელმა, ედუარდ აღასარიანმა განუცხადა.

აღასარიანის თქმით, მიმდინარე წლის პრიორიტეტად კვლავ სოფლის მეურნეობა რჩება. „წელს, ძალიან ბევრი პროექტი გვაქვს განსახორციელებელი. ამ ეტაპზე, უკვე გვაქვს ოთხი ძირითადი მიმართულება. ვიწყებთ მუშაობას ახალქალაქი-ბავრას საავტომობილო გზაზე, რომლის სიგრძეც 1 132 მეტრია. სახელმწიფო ბიუჯეტიდან უკვე გამოყოფილია 1 მლნ 32 000 ლარი. ამ პროექტის ფარგლებში ასევე იგეგმება 8 მრავალბინიანი საცხოვრებელი კორპუსის შიდა ეზოების მოასფალტება. ახალქალაქში წელს, ასევე ვგეგმავთ 14 ქუჩის რეაბილიტაციას, მათი საერთო სიგრძე 2 286 მ-ია, საამისოდ უკვე გამოყოფილია 1 მლნ 553 000 ლარი. აღნიშნული პროექტები დაიწყება ცოტა ხანში და დასრულდება ზუსტად 100 დღეში. ვიწყებთ მუშაობას წყლის გაყვანილობაზე, ჯამში გასაკეთებელია 7 648 მ და გამოყოფილია 176 000 ლარი.

დაგეგმილია ასევე ახალქალაქის ცენტრალური სტადიონის გარემონტება, საამისოდ 100 000 ლარი უკვე გამოიყო. აქვე მინდა დავამატო, რომ აღნიშნული პროექტები ფინანსდება ცენტრალური ბიუჯეტიდან. წელს, მუნიციპალიტეტისთვის პრიორიტეტული ისევ და ისევ სოფლის მეურნეობაა. სახნავი ბარათების 70% უკვე დარიგებულია, ვაუჩერების დარჩენილ ნაწილს კი უახლოეს დღეებში დავარიგებთ“ - აღნიშნა ახალქალაქის მუნიციპალიტეტის გამგებელმა და დასძინა, რომ აღნიშნული პროექტების გარდა, გამგეობა 2016 წლის განმავლობაში რამდენიმე მნიშვნელოვან პროექტს ადგილობრივი ბიუჯეტის დაფინანსებითაც განახორციელებს.