ირანელი მილიარდერი ბიზნესმენი ბაბაქ ზანჯანი კორუფციის ბრალდებით გაასამართლეს და სიკვდილით დასჯა მიუსაჯეს. ამის შესახებ BBC ირანის სასამართლოზე დაყრდნობით იუწყება.

ზანჯანი 2013 წლის დეკემბერში დააპატიმრეს და ნავთობის შემოსავლებიდან მილიარდების დამალვასა და ამ თანხების მის კომპანიებში მიმართვაში დაადანაშაულეს. იგი ბრალდებებს უარყოფს.

42 წლის ზანჯანი, თაღლითობისა და ეკონომიკური დანაშაულისთვის გასამართლდა, განაცხადა სასამართლოს წარმომადგენელმა ბრიფინგზე.

ბრიტანული "გარდიანის" ცნობით, პროკურორებმა ზანჯანის ბრალი დასდეს იმაში, რომ მას მთავრობის 2.7 მილიარდი აშშ დოლარის ვალი მართებს და ეს თანხა მის მიერ ირანის ნავთობის სამინისტროს სახელით გაყიდული ნავთობიდან თაღლითური გზით აქვს მოპოვებული.

ირანის ერთ-ერთი ყველაზე მდიდარი ადამიანი, ზანჯანი ნავთობთან დაკავშირებით ირანზე დაწესებული სანქციებისთვის თავის არიდებაში გაწეული დახმარების გამო, შეერთებული შტატებისა და ევროკავშირის მიერ შავ სიაში იყო შეყვანილი.

მასთან ერთად სიკვდილი კიდევ ორ ადამიანს მიესაჯა და ყველა მათგანს სასამართლომ თაღლითური გზით მოპოვებული თანხების უკან დაბრუნება დაავალა.

ზანჯანი საყოველთაოდ ცნობილი ბიზნესმენი იყო სანავთობო სფეროში, რომელიც 2010 წლის შემდეგ ირანის მთავრობის სახელით, გაერთიანებული არაბეთის საამიროებში, თურქეთსა და მალაიზიაში მილიონობით ბარელის გასაყიდად კომპანიების ქსელს იყენებდა.

ბრიტანული "გარდიანის" ცნობით, ზანჯანი 10 მილიარდი აშშ დოლარის ქონების მფლობელია.