ნინოწმინდის მუნიციპალიტეტის 2016 წლის ბიუჯეტი  7 909 100 ლარს შეადგენს, აქედან   2 733 100 ლარი გათანაბრებული ტრანსფერია, 165 000 ლარი მიზნობრივი ტრანსფერი; 130 000 - გადასახადები; 1 292 000 ლარი გარდამავალი  ნაშთი; 156 000 ლარი სხვა შემოსავლები; 20 000 ლარი  არაფინანსური აქტივების კლება; 1 700 000 ლარი რეგიონული ფონდის თანხა; 543 000 ლარი კი სოფლის მხარდაჭერის პროგრამა. ამის შესახებ ინფორმაცია guardian.ge -ს ნინოწმინდის მუნიციპალიტეტის გამგებელმა, გაგიკ კარსლიანმა მიაწოდა.


როგორც ნინოწმინდის მუნიციპალიტეტის გამგებელმა განაცხადა, მსხვილი ინფრასტრუქტურული პროექტების მხრივ, მიმდინარე წელს დაგეგმილია ქ. ნინოწმინდის ერევნის ქუჩისა და დიდი და პატარა არაგიალებისა და ჰეშტიას გზების მონაკვეთების მოასფალტება, რისთვისაც 1 700 000 ლარი დაიხარჯება, სოფლებთან დამაკავშირებელი საავტომობილო გზებისა და შიდა სასოფლო გზების მოხრეშვას კი ჯამში 300 000 ლარი მოხმარდება.


გაგიკ კარსლიანმა guardian.ge -ს დეტალური ინფორმაცია მიაწოდა იმასთან დაკავშირებით, თუ რომელი სოფლების დამაკავშირებელი გზებისა და შიდა სასოფლო გზების მოხრეშვაა დაგეგმილი და კონკრეტულად, რა თანხები დაიხარჯება ამ მხრივ თითოეული გზის მონაკვეთისთვის.


გამგებლის თქმით, წელს განხორციელდება სპასოვკა-ორლოვკას გზის მოხრეშვა, რაზეც  35 000 ლარი დაიხარჯება, ამდენივე ოდენობის თანხაა გათვალისწინებული დიდი ხანჩალის შიდა გზების მოსაწესრიგებლად. ფოკა-ვლადიმიროვკას დამაკავშირებელი გზის შესაკეთებლად კი 25 000 ლარი, ხოლო თავად ფოკას შიდა გზებისთვის  30 000 ლარია განსაზღვრული; 30 000–30  000 ლარია ასევე  განსაზღვრული ჯიგრაშენისა და პატარა არაგიალის (თითოეულისთვის) შიდა გზებისთვის, ხოლო ოროჯალარში ამ მიმართულებით 35 000 ლარი დაიხარჯება. გორელოვკას შიდა გზების მოწესრიგებას 40 000 ლარი მოხმარდება, ამდენივე თანხაა გამოყოფილი ნინოწმინდა-ოროჯალარის გზის აღსადგენად.


ნინოწმინდის მუნიციპალიტეტის გამგებლის ინფორმაციით, 300 000 ლარი რიტუალების სახლების მშენებლობასა და რეაბილიტაციას, ასევე ავეჯის შეძენას მომხმარდება ქ. ნინოწმინდაში, ჟდანოვაკანში, სადაც ახალი ამგვარი სახლი აშენდება - გორელოვკაში, ტამბოვკაში, ოროჯალარში, ეფრემოვკასა და უჩმანაში.


გაგიკ კარსლიანის თქმით, 150 000 ლარი ფოკაში, გორელოვკასა და ჰეშტიაში კულტურის სახლების რეაბილიტაციისთვის დაიხარჯება. ასევე დაგეგმილია გარე განათებების, სპორტული მოედნების, სპორტული დარბაზების მშენებლობა, რისთვისაც ჯამში ასეულობით ათასი ლარია განსაზღვრული.