"ბოლო ხანებში დიდი აჟიოტაჟი მოჰყვა ცალკეულ საკითხებს, კერძოდ იმას, რომ რესპუბლიკურმა პარტიამ და პრემიერ მინისტრმა გიორგი კვირიკაშვილმა განაცხადეს მზაობა სტრატეგიულ პარტნიორობაზე," - ეს განცხადება პარლამენტის თავმჯდომარე, დავით უსუფაშვილმა დღეს გამართულ პრეს-კონფერენციაზე გააკეთა. მისი თქმით, ამას მოჰყვა ბევრი სპეკულაცია და აქედან გამომდინარე მას განმარტების გაკეთება სურს.


"ჩვენ ვსაუბრობთ არა ორპარტიულ კოალიციაზე, არამედ ორ პარტიას შორის სტრატეგიული თანამშრომლობის თაობაზე შეთანხმებაზე. ეს არის სრულიად ბუნებრივი ამბავი, იმიტომ რომ მომავალ კოალიციურ ურთიერთობებში, რა თქმა უნდა, ჩვენთვის "რესპუბლიკელებისთვის", ყველაზე მნიშვნელოვანია ის, გვაქვს თუ არა ურთიერთობა, კოალიციის მთავარ, წამყვან პოლიტიკურ ძალასთან, პარტია „ქართულ ოცნებასთან“. აბა, პირიქით ხომ არ დავიწყებდით პროცესს, რომ ჯერ ჩვენს კოლეგებს და ნაცად მეგობრებს, „კონსერვატორებს“ შევუთანხმდეთ პარტნიორობაზე და მერე ერთად მივადგეთ პარტია „ქართულ ოცნებას?" - აღნიშნა დავით უსუფაშვილმა და დაამატა:


„ჩვენ გადავდგით ის ნაბიჯები, რაც გადასადგმელი იყო და უახლოეს მომავალში, ამის თაობაზე გვექნება სიცხადე. ეს სიცხადე სჭირდება კოალიციას, პარტიებს, ქვეყანას. ჩვენ ვართ სახელისუფლებო პასუხისმგებლობით დატვირთული, გვაკისრია ვალდებულებები, ამიტომ არანაირმა განსჯამ მომავლის თაობაზე, ხელი არ უნდა შეუშალოს მიმდინარე საკითხების საქმის განხილვას. ვინც ამ თემაზე ზედმეტად ნერვიულობს, მინდა ვუთხრა, რომ მოიკრიბოს ძალა, რადგან ხვალ, შესაძლოა, უფრო მეტი სანერვიულო ჰქონდეს," განაცხადა უსუფაშვილმა.