მექსიკის პრეზიდენტმა განაცხადა, რომ არ წაუყრუებს თეთრი სახლის დასაკავებლად მებრძოლი დონალდ ტრამპის მიერ შეერთებულ შტატებსა და მექსიკას შორის კედლის აღმართვის წარმოდგენილ პროექტს. მან დონალდ ტრამპის „მკვეთრი ტონი“ ადოლფ ჰიტლერის და ბენიტო მუსოლინის ტონს შეადარა.

პრეზდენტ ენრიკე პენა ნიეტოს კომენტარები, რომელიც ორშაბათს გამოსულ გაზეთ Excelsior -ში გამოქვეყნდა, ნიუ იორკელი მილიარდერის მიმართ უცხოელი ლიდერის მიერ გაკეთებული ყველაზე კრიტიკული საჯარო კომენტარების რიცხვს მიეკუთვნება.

დონალდ ტრამპმა, რომელიც სადღეისოდ შეერთებული შტატების რესპუბლიკელ კანდიდატებს შორის მოწინავე პოზიციას იკავებს, რამდენიმე თვის წინათ განრისხებით განაცხადა, რომ მისი პრეზიდენტად გახდომის შემთხვევაში, იგი შეერთებული შტატების სამხრეთ საზღვარზე კედელს ააშენებდა და დაიცავდა ამერიკას მექსიკიდან არალეგალი ემიგრანტებისა და ნარკოტიკების შემოდინებისაგან.

პენა ნიეტო თავს დაესხა ტრამპის კამპანიის „პოპულიზმს“, რომელიც მისი აზრით, „ძალიან ადვილ, პრობლემების მარტივ გადაწყვეტას სთავზობს, მაგრამ სულაც არაა ისე ადვილი გადასაწყვეტი, როგორც ეს ერთი შეხედვით სჩანს.“

„სამწუხაროდ, კაცობრიობის ისტორიაში იყო ეპიზოდები, როცა ამგვარმა მკვეთრმა რიტორიკამ და გამონათქვამებმა, ისტორიაში ავის მომასწავებელი სიტუაციების წარმოშობა განაპირობეს,“ დაამატა მექსიკის პრეზიდენტმა.

„ესაა ის, რაც მუსოლინიმ გააკეთა, რაც ჰიტლერმა გააკეთა, მათ ისარგებლეს შექმნილი მდგომარეობით, პრობლემით, შესაძლოა, რომელშიც კაცობრიობა იმ დროს, ეკონომიკური კრიზისის შემდეგ იმყოფებოდა და მე ვფიქრობ, მათ მიერ გადადგმული ნაბიჯებიდან მივიღეთ ის დიდი ხანძარი, რაც ჩვენ ისტორიიდან ვიცით. ჩვენ არ გვინდა მოხდეს იგივე, სადმე მსოფლიოში,“ აღნიშნა პენა ნიეტომ.