საქართველო იმ ქვეყნების სიაში გადავა, რომელთა მოქალაქეებსაც ევროკავშირის წევრი ქვეყნების ტერიტორიაზე ვიზიტისთვის ვიზა აღარ დასჭირდებათ, - ნათქვამია ევროკომისიის მიერ საქართველოსთან ვიზალიბერალიზაციის საკითხზე მომზადებულ დოკუმენტში, რომელიც ევროკავშირის ოფიციალური ჟურნალის ვებგვერდზე დღეს გამოქვეყნდა.

საქართველოსთან ვიზალიბერალიზაციის საკითხზე მომზადებული წინადადება ევროკომისიამ ევროპარლამენტსა და ევროკავშირის საბჭოს წარუდგინა. სწორედ ამ უწყებებმა უნდა მოახდინომ საბოლოოდ საქართველოსთვის ვიზალიბერალიზაციის მინიჭება.

"საქართველომ მიაღწია ყველა იმ ნიშნულს, რაც ვიზალიბერალიზაციის სამოქმედო გეგმაში იყო აღნიშნული და რომელიც საქართველოს მთავრობას 2013 წლის თებერვალში წარედგინა. საქართველო აკმაყოფილებს არსებულ კრიტერიუმებს იმისათვის, რომ საკუთარ მოქალაქეებს ევროკავშირის წევრ ქვეყნებში მოგზაურობისთვის ვიზა არ დასჭირდეთ", - აღნიშნულია დოკუმენტში.

დოკუმენტში გაკეთებულია განმარტება, რომ ვიზალიბერალიზაციასთან დაკავშირებით შემუშავებულ რეგულაციაში არ მონაწილეობს დიდი ბრიტანეთი და ირლანდია და რეგულაცია ამოქმედდება ისლანდიაში, ლიხტენშტეინში, ნორვეგიასა და შვეიცარიაში.

დოკუმენტში ასევე წერია, რომ ეს რეგულაცია დამტკიცების შემდეგ ძალაში შევა ევროკავშირის ოფიციალურ ჟურნალში გამოქვეყნებიდან მე-20 დღეს. "რეგულაცია არის ევროკავშირის საერთო სავიზო პოლიტიკის ნაწილი, რომელიც 180-დღიან პერიოდში 90 დღით დარჩენას გულისხმობს", - წერია დოკუმენტში, რომელიც ევროკავშირის ოფიციალური ჟურანლის ვებგვერდზე უკვე გამოქვეყნდა. მას ევროკომისარი მიგრაციის საკითხებში დიმიტრის ავრამოპულოსი პრესკონფერეციაზე რამდენიმე საათში წარადგენს.

სავიზო რეგულაციების შესახებ დოკუმენტი ევროკავშირის წევრ ქვეყნებში, მისი ძალაში შესვლისთანავე ამოქმედდება.