„2016 წელს, ახალქალაქის მუნიციპალიტეტში, სოფლის მხარდაჭერის პროგრამის ფარგლებში, 1 მილიონ 111 000 ლარი დაიხარჯება," - ამის  შესახებ guardian.ge-ს ახალქალაქის მუნიციპალიტეტის გამგებელმა, ედუარდ აღასარიანმა განუცხადა.


გამგებლის თქმით, ამ ეტაპზე მუნიციპლაიტეტის ხელმძღვანელი პირები თითოეულ სოფელში შეხვედრებს მართავენ, რათა გამოიკვეთოს ის მთავარი მიმართულებები, რაშიც სოფლის მხარდაჭერის პროგრამით გამოყოფილი თანხები დაიხარჯება.


„29 თებერვლიდან 15 მარტამდე ახალქალაქის მუნიციპალიტეტის ყველა სოფელში გამგეობა ატარებს კრებებს, სოფლის მხარდაჭერის პროგრამის ფარგლებში განსახორციელებელი პროექტების პრიორიტეტების შესარჩევად. ყველა შეხვედრაზე იწერება ოქმი და იგზავნება დედაქალაქში, კეთდება ხარჯთაღრიცხვები. მას შემდგ, რაც მოხდება მოსახლეობის საჭიროებების და სურვილების გამოვლენა, დაიგეგმება პროექტები, დაიწყება მათი განხორციელება. ვფიქრობ, რომ პრიორიტეტული წელს მუნიციპალიტეტის  მოსახლეობისთვის  იქნება სასმელი წყალი, გზების  მოხრეშვა და მოწესრიგება. სარიტუალო სახლების  სარემონტო სამუშაობის დასრულება.


წელს, სოფლის მხარდაჭერის პროგრამის ფარგლებში, 1 მლნ 111 000 ლარი დაიხარჯება 64 სოფლისთვის, რაც წინა წელთან შედარებით, 44 000 ლარით მეტია,“ განუცხადა guardian.ge -ს ედუარდ აღასარიანმა და დაამატა, რომ თუ აღნიშნული თანხა არასაკმარისი აღმოჩნდება, მაშინ ადგილობრივი ბიუჯეტიდან დამატებით გამოიყოფა თანხები და საჭირო პროექტების თანადაფინანსება განხორციელდება.


გარდა ამისა, ახალქალაქის გამგებლის ინფორმაციით, 2016 წელსაც განხორციელდებასოციალური პროგრამების დაფინანსება.


„გვყავს მოსახლეობა, რომელთაც დანგრეული სახლები აქვთ, მათთან მიდიან ადგილზე გამგეობის  კომისიის წარმომადგენლები, აკეთებენ  ხარჯთაღრიცხვას და ამის შემდეგ ხდება დახმარების გაწევა. ასევე, მინდა აღვნიშნო, რომ ახალშობილებისთვის გამოყოფილი გვაქვს  250 ლარი. გარდა ამისა, მოქმედებს ჯანდაცვის პროგრამები, საოპერაციო თანხები და ა.შ.“ აღნიშნა ედუარდ აღასარიანმა.


ახალქალაქის გამგებლის თქმით, მუნიციპალიტეტის 2016 წლის ბიუჯეტი ჯამში 10 მილიონ 61 ათას ლარს შეადგენს, საიდანაც ადგილობრივი წილი - 7 მლნ 200 000 ლარია, ცენტრალური კი, 2 მლნ 861 000 ლარი.