ხობის მუნიციპალიტეტს საქართველოს რეგიონული განვითარებისა და ინფრასტრუქტურის სამინისტრომ „სოფლის მხარდაჭერის პროგრამის“ ფარგლებში 2016 წელს 848 311 ათასი ლარი გამოუყო. საერთო ინტერესების გათვალისწინებით, პროგრამა რამდენიმე დასახლებისათვის განკუთვნილი თანხის გაერთიანებასაც ითვალისწინებს.

როგორც guardian.ge -ს ხობის მუნიციპალიტეტიდან აცნობეს, მიმდინარე კვირის განმავლობაში ხობის მუნიციპალიტეტის საკრებულოს თავმჯდომარე ედიშერ ჯობავა, გამგებლის პირველი მოადგილე ვარაზ გაბედავა, საკრებულოს საფინანსო-სარევიზიო კომისიის თავმჯდომარე ტარიელ ალექსანდრია, საკრებულოს ეკონომიკური განვითარების საკითხთა კომისიის თავმჯდომარე გოჩა სიჭინავა და გამგეობის ინფრასტრუქტურის, ურბანული განვითარებისა და არქიტექტურის სამსახურის უფროსი ზაზა ბუკია ოცდაერთივე ადმინისტრაციულ ერთეულში მოსახლეობას შეხვდნენ, „სოფლის მხარდაჭერის პროგრამით“ გათვალისწინებული პირობები გააცნეს და მათი პრობლემები მოისმინეს.

ამის პარალელურად საკრებულოში საკრებულოს კომისიების მხრიდან მიმდინარეობს გამგეობის სამსახურების და ადგილობრივი თვითმმართველობის იურიდიული პირების ანგარიშების მოსმენაც. საბოლოო შემაჯამებელ ანგარიშს საკრებულოს ხობის მუნიციპალიტეტის გამგებელი გოჩა ქაჯაია წარუდგენს.

საქართველოს მთავრობამ სოფლის მხარდაჭერის 2016 წლის პროგრამის განსახორციელებლად 2016 წლის სახელმწიფო ბიუჯეტიდან სულ 50 მილიონი ლარი გამოყო. თითოეული მუნიციპალიტეტისათვის გამოსაყოფი თანხის გაანგარიშებას საქართველოს რეგიონული განვითარებისა და ინფრასტრუქტურის სამინისტრო მოსახლეობის რაოდენობაზე დაყრდნობით ახორციელებს.

საქართველოს მთავრობის მიერ დამტკიცებული სოფლის მხარდაჭერის პროგრამის მიხედვით, 1-დან 200 სულის ჩათვლით დასახლებისათვის 4 000 ლარია გათვალისწინებული, 201-დან 400 სულის ჩათვლით დასახლებისათვის – 5 000 ლარი, 401-დან 1 000 სულის ჩათვლით დასახლებისათვის – 8 000 ლარი, 1 000-სზე მეტსულიანი დასახლებისათვის კი – 12 000 ლარი.