„ჩვენ ვნახეთ, რომ რამდენიმე კვირის წინათ ტყვიებით და ჩაქუჩებით გაუსწორდნენ ოპოზიციური პარტიის, ჩვენს ერთ-ერთ ლიდერს, მე-2 შემთხვევაში კი მორალური მკვლელობა იყო დაგეგმილი ერთ-ერთი ჩვენი ლიდერის,“ აღნიშნული განცხადება „თავისუფალი დემოკრატების“ თავმჯდომარემ ირაკლი ალასანიამ „რუსთავი2“ -ზე „კურიერში“ ბათუმიდან პირდაპირ ეთერში ჩართვისას გააკეთა.

ალასანიას თქმით, ყოველივე ეს მხოლოდ იმას მიუთითებს, რომ ეს არის აშკარად მიზანმიმართული პოლიტიკური ბრძოლა მათ წინააღმდეგ.

„იმ ადამიანების ჯგუფმა, იმ ორგანიზებულმა, დანაშაულებრივმა ჯგუფმა, ვინც ეს გააკეთა, გადალახა ყველა ზღვარი, წითელი ხაზი, საზოგადოებას და მთელ ჩვენს ქვეყანას გამოწვევა გაუკეთეს, ამიტომ ჩვენ უნდა გვქონდეს სწორი, ადეკვატური პასუხი და ერთადერთი არის ის, რომ დამანაშავე უნდა იყოს დაკავებული და კანონის მთელი სიმკაცრით დასჯილი,“ განაცხადა ირაკლი ალასანიამ.

მისი თქმით, ეს არის ტესტი არა მარტო სამართალდამცავი სამსახურებისთვის, არამედ ახალი პრემიერ მინისტრისთვისაც.

„კიდევ ერთხელ ხაზს გავუსვამ და დანამდვილებით შემიძლია გითხრათ, რომ ხელისუფლებაში, და ეს ჩანს კიდევაც ღიად, ხელისუფლებაში არიან ძალები, მათ შორის სამართალდამცავ სტრუქტურებში, რომელიც არ იმართება პრემიერისგან და იმართება არაფორმალურად სხვა პირების მიერ. მე დიდი ეჭვი მაქვს, რომ დიდი ალბათობით შეიძლება სწორედ აქედან ყოფილიყო გადამდგარი ეს მზაკვრული, ამორალური ნაბიჯი,“ აღნიშნა ალასანიამ.